Кога клучните луѓе од модниот свет отворено се декларираат како продемократи, се јавува можен проблем во кабинетот на новата прва дама на САД, Меланија Кнаус – што сега ќе носи таа?! Чии креации?! Кој американски дизајнер ќе соработува со Меланија?!
За време на кампањата за претседателското место во Белата куќа, американските дизајнери јавно истапија против Доналд Трамп, а на списокот на поддржувачи на другиот кандидат, Хилари Клинтон е долг: Вера Ванг, Келвин Клајн, Марк Џејкобс, Џозеф Алтузара, Дона Каран, Мајкл Корс, Прабал Гурунг, Дајан фон Фурстенберг, Џорџина Чепмен од „Маркеза“, Џејсон Ву кој го креираше инаугурацискиот фустан на Мишел Обама… Некои од нив заедно со Ана Винтур од Vogue и други значајни имиња од модата помогнаа во кампањата на Клинтон. Како и да е, се случи што се случи, Трампови сега се селат во Вашингтон, но останува едно прашање да лебди на Словенката што стана прва дама – кој сега ќе сака да ја облекува Меланија?
Секако треба да се нагласи дека Меланија Трамп, за разлика од некои јавни лица кои редовно позајмуваат или добиваат облека на подарок од познатите креатори, таа сама си ја купува гардеробата. Проблемот не е во парите, туку во имиџот, желбата на дизајнерите да соработуваат и да се гордеат доколку таа нив ги избере. Во последните децении скоро сите први дами, од Џеки Кенеди до Мишел Обама, биле во некаква соработка со одредени американски дизајнери. И тоа било акцентирано постојано. Сега се поставува прашањето кој ќе се осмели неговото име да биде спомнувано во контекст на соработка со новата прва дама.
Во финишот од долгата претстедателска кампања, се направија многу анализи за стилот на Меланија, за секој детаљ, секоја комбинација и боја. Дел од анализите се однесуваат на тоа што стои зад јавниот имиџ на Меланија. Од тоа може да се насети каква прв дама ќе биде, која ќе биде нејзината улога, и што порака праќа нејзината облека. Тоа се вика Power Dressing, или како да се изгради имиџ преку гардеробата.
Еве ги најзначајните изгледи од последните месеци и пораката зад нив.
Бел фустан од српската дизајнерка Роксанда Илинчиќ, 2.190 долари
Меланија во овој фустан се појави кога го држеше својот прв јавен говор за време на претседателската кампања. Говорот можеби не беше оригинален, прогласен е за плагијат на еден постар говор на Мишел Обама, ама изборот на дизајнер е малку невообичаен. Да речеме оригинален. Креацијата не е на американски дизајнер, нешто што американските гласачи очекуваат, туку на српската дизајнерка Роксанда Илинчиќ која кариера гради во Лондон. Меланија е родена во Љубљана, Роксанда во Белград, градови кои некогаш биле дел од Југославија, па изборот некои го протолкуваа како намиѓање на старата татковина, поддршка на „локална“ дизајнерка која исто како и неа, успеала во светски рамки. Став кој зборува за еманципацијата на жените, но и на остварувањето на американскиот сон.
Розовата Pussy Bow кошула од „Гучи“, 1.100 долари
Моделот на кошули со голема панделка околу вратот, често именуван како Pussy Bow, стана актуелен во 70-тите години и се сметаше за симбол на феминизмот и на вработената жена која во тоа време почнала да ги добива директорските места во корпоративниот свет. Но, во случајот на Меланија има сосема поинаква конотација – оваа кошула таа ја облече на конвенција на Републиканците веднаш по скандалот кој покажа и уште еднаш докажа дека Доналд Трамп е шовинист и сексист кој себе си дава правo сексуално да ги малтретира жените (На една снимка се слуша како советува Get them by the pussy, што е тотално навредливо). Во моментот кога светот бруеше за овој скандал, Меланија одлучи да носи Pussy кошула, симбол на феминизмот. Тоа беше принуден избор за да се отргне вниманието од мачизмот на Доналд или потсвесна опомена дека е свесна за неговиот шовинизам? Само таа знае.
Бел комбинезон од Ралф Лорен, 4.000 долари
За првото појавување по победата на Доналд Трамп на претседателските избори во САД Меланија избра бел комбинезон со асиметричен горен дел од американски дизајнер Ралф Лорен. Која е пораката?! Дали тоа Меланија и става трн во око на Хилари Клинтон, славејќи ја победата на сопругот облечена во комбинација која реферира на Хилари?! Имено, Хилари на клучните настани за време на кампањата носеше бел костум со панталони, а голем број нејзини поддржувачи на гласање се појавија облечени во бела боја како знак на солидарност. Исто така, Хилари на трите претседателски дебати носеше креации од Ралф Лорен, а тој беше нејзин избор на дизајнер во текот на бурниот изборен циклус. Се чини дека Меланија со својот тим воопшто не се наивни во испраќањето порака преку облеката…
Нема коментари