Клучни излози на одредени продавници на улица Македонија во Скопје ќе бидат уредени со посебен дизајн како дел од фестивалот „Недела на излозите“ (Window displays week – WDWmovement), кој се отвора утре, 10 декември, во ресторанот „Пелистер“ во 19 часот во присуство на Амбасадорката на Швајцарија и други еминентни гости, а заинтересираните ќе можат да го посетат до 17 декември.
„Недела на излозите” е нов фестивал за креативност, современост и уникатност доловени преку излозите кои се естетски симболи на визуелната култура на градот. За првото издание на фестивалот, младите модни дизајнери и архитекти со преуредување на неколку излози и еден пасаж, го претворија центарот на градот Скопје во модерна галерија. Фестивалот ќе трае од 10 до 17 декември, а преуредени се излозите на: книжарницата Култура, часовничарот Хронометар, Театарот за деца и младинци, книжарницата Литература.мк, продавницата за чоколадо на швајцарскиот бренд Линд, и пасажот до книжарницата Литература.мк. Зад креативниот концепт и реализацијата на секој излог стои тим составен од млади архитекти и модни дизајнери, кои на свој начин пренесуваат важни пораки до минувачите и раскажуваат различни приказни. „МладиХаб“, т.е. Канцеларијата на претседателот (кај Рекорд), ќе служи како инфо поинт на фестивалот каде што ќе може да се погледнат сите креативни концепти за излозите и ќе може да се подигнат информативни материјали за фестивалот.
Овој проект започна во јануари годинава и се одвиваше во три фази: едукација преку три мастер класови одржани од страна на светски реномирани експерти од Лондон и Париз со огромно искуство во областа на модниот дизајн, естетско уредување на комерцијалните простори (visual merchandizing), визуелната уметност и архитектурата; работилници за градење на креативните концепти за уредување на излози одржани од локални и регионални експерти; и последната фаза – реализација на креативните концепти со локални ментори професионалци со интернационално искуство во областа на архитектурата, модниот дизајн и модната теорија. Преку соработката за овој фестивал, младите архитекти и модни дизајнери ги открија вештините на естетското уредување на комерцијалните простори (visual merchandizing). Покрај едукативна, целта на овој фестивал е подигнување и сензибилизација на локалната визуелна култура, повеќе од кога било потребна на градот Скопје.
Партнери на првото издание на фестивалот се: центарот за дизајн и иновации „Јавна Соба“ во Скопје, Технолошко металуршкиот факултет во Скопје, Архитектонскиот факултет во Скопје и „МладиХаб“, односно Канцеларијата на претседателот (кај Рекорд).
Повеќе информации за фестивалот и за најавениот настан може да најдете на: www.windowdisplaysweek.com и на Facebook страницата на фестивалот @WDW Movement.
АГЕНДА за отворањето на фестивалот (10.12.2019):
18:30 следете ја мапата и погледнете ги уникатно декорираните излози
19:00 повелете на отворената тераса во ресторанот Пелистер
19:10 отворање на фестивалот и кратко обраќање на амбасадорката на Швајцарија Сибил Зутер Техада и на основачите на фестивалот: Кристина Глигоровска, координатор на фестивалот, Искра Јанковска Михајловска, координатор за архитектура и Лидија Георгиева, координатор за моден дизајн.
19:25 коктел забава со диџеј Соња Исмаил
Нема коментари