Со богата програма и со најдобрите претставници од свадбената индустрија на 23 февруари се отвора традиционалниот Саем за венчавки “Wedding Expo 24″, вака го најавува саемот организаторот на настанот, интернет порталот за културата на венчавките www.vobelo.mk.
Ова ќе биде 12-то издание на саемот, а по традиција ќе се одржи во хотелот „Александар Палас“. Саемот ќе ги отвори вратите за посетителите во петок на 23 февруари во 18 часот, а ќе трае до недела, 25 февруари до 18 часот.
-На настанот ќе земат учество голем број на изложувачи од сите сфери на свадбената индустрија (дизајнери и ателјеа за венчаници, ресторани, музички групи, покани, бурми и накит, подароци, декорации за свадба, фотографи, костуми и обувки и друго), односно сè што е неопходно за организирање на свадбената прослава. Саемот е од изложбено-продажен карактер, па така идните младенци ќе имаат можност да ги видат, пробаат и купат своите венчанци, костуми, бурми, да договорат термин за свадба, да букираат бенд, да си обезбедат покани и декорација, фотограф, да пронајдат уникатни подароци за девериците, кумовите и друго. Богатата програма започнува во петок со модната ревија на „Познатите во венчаници и костуми“. Посетителите ќе имаат можност да видат многу познати ликови како модели на венчаници и костуми. Целата програма ќе биде збогатена и со индивидуални ревии (сабота и недела), како и настап на познати музички бендови – вели организаторот.
Водител и домаќин на настанот оваа година е Сања Савевска (водителка на „Брза кујна“ на телевизија Сител). Влезниците за саемот ќе се продаваат на самиот влез во хотелот како и онлајн, а цената е 150 денари. Со купувањето на билетот се станува и потенцијален добитник на голем број подароци кои ќе се извлекуваат за време на настанот. За идните невести ќе има и голем број на саемски попусти кои несомнено ќе ви го заштедат семејниот буџет.
Нема коментари