Најголемата гламурозна и модна забава со хуманитарен карактер позната како Мет Гала што со години се одржува секој прв понеделник во месецот мај, како увертира на отворањето на модните изложби во њујоршкиот музеј Метрополитен, годинава ќе се одржи, откако минатата беше откажана поради пандемијата. Но, има измена во однос на месецот на одржување, Мет Гала 2021 наместо во мај, најавена е за 13 септември.
Младата поетеса Аманда Горман, која што ја забележавме на јануарската претседателска инаугурација во Вашингтон, најверојатно ќе биде домаќинка на гала настанот. Се претпоставува дека кодомаќин ќе биде дизајнерот Том Форд, кој во моментов е претседател на Советот на американски модни дизајнери (CFDA).
Темата на најпознатиот моден настан нарекуван и „Модни Оскари“ и на кој ѕвездите се појавува во екстравагантни комбинации на одредена тема, ќе биде Америка. На 18 септември во Институтот за костими при Метрополитен ќе биде отворена модната изложба „Во Америка: Лексикон на модата“ (In America: A Lexicon of Fashion). Институтот годинава слави 75-ти јубилеј, па покрај оваа изложба (како прв дел), за април 2022 година го најавува вториот дел „Во Америка: Антологија на модата“ (In America: An Anthology of Fashion).
Двете изложби ќе траат до септември 2022 година двете имаат за цел да ѝ оддадат почит на американската мода и дизајнери, да ги искористат постојните музејски колекции, потоа да ја прикажат современата работа на американските дизајнери и да го истражат американскиот идентитет. Во пандемиската година, проблемите со одржливоста беа ставени во фокусот, па многу луѓе „повторно го открија“ локално производство. Кураторот Ендру Болтон верува дека американските дизајнери се во првите редови на промените во размислувањето за одржливост, разновидност и инклузивност, па сака на американската мода да ѝ ја врати моќта да раскаже приказна.
Минатата година поради Ковид-19 Мет Гала не се одржа, но иако во карантин, луѓето беа потикнати да обавуваат фотографии на Инсаграм под ознаката #MetGalChallenge и да креираат костими инспирирани од стајлинзите на познатите ѕвезди кои се појавиле на настанот.
*Не е дозволено пренесување на содржината на www.stylist.mk без одобрени на уредништвото. При објавување на материјали од модниот сајт www.stylist.mk, во други медиуми задолжително наведете го изворот од кој е преземен текстот и поставете хиперлинк. Цитирањето и објавувањето на линкот е задолжително, во спротивност ќе подлежите на правни мерки.
Нема коментари