Петте млади модни дизајнери Даниела Ѓуровска, Ангела Доневска, Марјан Бебекоски, Медаин Аслан и Христина Христова здружени во проектот „Коцка“ ќе се претстават на модна ревија проследена со танцов перформанс на 17 ноември, со почеток во 19.30часот,во Домот на култура „Димитар Влахов“ во Скопје.
-„Коцка“ е проект зад кој стојат млади креативци, уметници (дизајнери и современи танчери) и истиот е поддржан од Министерство за култура. Дизајнерите и танчерите преку свој, уникатен и за нив претпознатлив стил се обидуваат да допрат до јадрото на секојдневните проблеми со кои се соочува секој поединец во нашата држава – велат за себе.
Креативците овој проект го работеа под менторство на дизајнерката и нивната професорка од ТМФ, Лидија Георгиева, Рисима Рисимкин, уметничкиот директор на Скопје танцов театар. Кореографијата за настанот е на Адријана Данчевска.
Младите дизајнери вака го објаснуваат концептот на нивниот проект:
Суштината на овој проект е да поттикне афирмација на млади уметници и нивните дела од областа на современиот танц и модниот дизајн на територија на Македонија.
Оттука се поставува прашањето:
Каде е местоположбата на еден млад танчер или дизајнер во хиерархијата која ја налага нашето општество?
Одговорот на oва прашање се добива преку сензибилизација на актуелните теми во една стереотипна заедница во каква што и живееме. Фокусирањето кон сржта на проблемот доведува до развивање на идејни решенија чиј посакуван резултат е подигнување на самодовербата и храброст за гласно толкување на проблемите кои се дел од нашето секојдневие.
Самодовербата или недостиг од истата е појдовна точка на самиот проект. Стереотипи, предрасуди, неприфаќање во толпата, се само дел од оние нешта кои се „трн во око“, а се занемаруваат.
Нема коментари