По петти пат „Анима Мунди“ го организира „Вегефест“, фестивал со кој повикува на совесност, свесност, хуманост и разум, живот без да ги повредуваме животните. Петтото издание ќе се одржи во недела, 30 октомври, во Младинскиот културен центар, со почеток во 11 часот, а својата богата програма ја завршува доцна навечер. Влезот е слободен.
Модата не смее да биде сурова – тоа е нашата порака на Вегефест за сите креативци и модни љубители! Од тој аспект особено драга и важна новина за „Вегефест“ е гостувањето на еден од најдобрите македонски модни дизајнери Никола Ефтимов, чие предавање „Модна еволуција и револуција за правата на животните” убедени сме, ќе биде силен поттик за пресвртница во модниот свет во Македонија кон бојкот на кожата/крзното и прибегнување кон етички, еколошки прифатливи алтернативи. Предавањато на Ефтимов е закажано за 16.30 часот (на 30 октомври во МКЦ).
Еве дел од размисли на креатор за кои што ќе се зборува во недела на „Вегефест“:
Целта е да поттикнеме свесност, совесност, хуманост кон сите живи битија, бојкот на суровост; прибегнување кон етички, еколошко оддржливи и здрави модни алтернативи и воопшто алтернативи на живеење.
Да се види и разбере дека зад секое парче крзно, кожа стои животно лишено од слобода, мачено, одрано, убиено.
Да се поттикне современиот дизајнер да трага и твори со еколошки и етички прифатливи материјали, а не со кожа и крзно на експлоатирани и свирепо убиени живи битија.
Да се поттикне одговорност.
Да се поттикне современиот купувач да биде етичен во изборот, да знае што купува и што плаќа.
Модата рапидно се менува и драстично хуманизира, а модните дизајнери од целиот свет прибегнуваат кон опции кои исклучуваат животински суровини како кожа и крзно , т.е. се одлучуваат на користење на еко крзно и еко кожа. Во низата етички триумфи во светски рамки последен е Армани кој јавно објави дека повеќе крзно од животни нема да биде користено во ниту една колекција, и тоа го стори исклучиво од етички и еколошки причини.
Нема коментари