Без тенденција да звучиме површно, но доделувањето на филмските награди Оскар во еден сегмент е и приказна за модата и црвениот килим. А на црвениот килим вчера прошета и тимот на македонскиот филм „Медена земја“, кој беше номиниран за Оскар во две категории, за документарен филм и за странски филм.
Режисерите Тамара Котевска и Љубо Стефанов, снимателите Самир Љума и Фејми Даут, продуцентот Атанас Георгиев и харизматичната Атиџе Муратова прошетаа на црвениот килим рамо до рамо со најголемите холивудски ѕвезди. Атиџе Муратова се појави во креација на Тања Кокев, блиска до нејзината сензибилитет и личниот стил. Веруваме дека Атиџе се чувствувала прекрасно на вчерашните Оскари и дека баш ѝ е гајле за илјадниците коментари, паметувања и „експертски“ мислења на социјалните мрежи, за тоа дали таа треба да се дотера или треба да изгледа како во филмот (што е ноторна глупост). Атиџе зрачеше со својата енергија. Дотерана, но сепак своја.
Во дизајни на Кокев беше облечен и машкиот дел од медениот тим Љубо, Самир, Фејми и Атанас – свечени фрак костими комбинирани со бели и црни кошули. Корежисерката Тамара Котевска избра да носи модел на американскиот дизајнер Марк Боувер.
На Фејсбук забележавме дека за изгледот на нашите се погрижиле и сестрите Љупка и Мила Арсови, кои своевремено во Скопје го држеа салонот за убавина „Есенс“, а сега живеат во САД и го водат салонот Ame Salon во Њу Џерси.
Нема коментари