Викендов во Париз, на 86-годишна возраст почина францускиот дизајнер Емануел Унгаро, информацијата ја потврди неговото семејство. Роден на југот на Франција во семејство на италијански емигранти, Унгаро беше еден од најпознатите и најпродуктивните модни креатори во минатиот век. Занаетот почнал да го учи кога татко му поклонил машина за шиење, а долгата кариера на дизајнер ја почнал откако се преслил во Париз, во средината на 50-тите години работел како асистент на познатиот Кристобал Баленсијага, а во 1965 година ја отворил сопствената модна куќа. Во својата работа внесуваше сензуалност и заводливост, многу боја и дезени, а се водеше според мислата дека „жената не треба да го носи фустанот, таа треба да го живее фустанот“.
Креираше висока мода и претапорте колекции, како и машка мода, а во текот на својата кариера изгради вистинска модна империја која се прошири на чевли, очила и парфеми. Парфемите и денес се важен дел од брендот, a најпопуларен е „Дива“, лансиран во 1983 година. Пред една деценија нашата манекенка Катарина Ивановска беше заштитно лице на парфемот и кампањата со нејзиниот лик се појави ширум светот.
Негови клиенти и обожаватели беа Џеки Кенеди, Изабел Аџани и Катрин Денев. Во 1996 година семејството Ферагамо купи неговата модна куќа, а Емануел од креирањето комплетно се повлече во 2004 година. Модната куќа што го носи неговото име по неговото повлекување, се обиде со неколку дизајнери на позицијата креативен директор, од пред две години за брендот креира Марко Колагроси.
Нема коментари