Џејн Биркин (1946-2023)
Легендарната Џејн Биркин пронајдена е мртва во својот дом во Париз, известија вчера француските медиуми. Англиско-француската ѕвезда се сметаше за модна икона во доцните 60-ти и 70-тите години, синоним на ноншалантниот стил и природната убавина, препознатлива по комбинациите со звонести фармерки и бели блузи, плетени мини фустани и сламени корпи наместо чанта – таа сè уште е олицетворение на францускиот шик за многу жени ширум светот. Беше и инспирација за најпознатата чанта во светот – Hermès Birkin. Приказната е дека за време на еден авионски лет го запознала Жан-Луј Дима, извршниот директор на Hermès и му се пожалила колку е тешко да се најде чанта што одговара на сите нејзини потреби како мајка – од овој разговор се роди чантата Birkin.
Родена во Лондон, Џејн славата ја стекна во Франција пеејќи на француски јазик, како резулатат на професионалниот и приватниот однос со музичарот Серж Гинсбер. Нејзината лична врска со Генсбур ја направи позната низ светот по нивниот меѓународен хит „Je t’aime… moi non plus“. Контроверзниот секси дует снимен во 1968 година, ги згрози пуританците и беше забранет од страна на Папата.
Од врската со Генсбур ја има ќерката Шарлот, денес позната актерка, од первиот брак со Џон Бери, композиторот на Џејмс Бонд филмоците ја роди Кејт Бери, а третата ќерка Лу Дојон е од врската со францускиот режисер Жак Дојон.
Кариерата ѝ ја одбележаа повеќе музички хитови и актерски улоги, а во Франција беше славена и за нејзиниот политички активизам. Претседателот Емануел Макрон ја нарече „комплетен уметник“. „Џејн Биркин беше француска икона затоа што беше инкарнација на слободата, ги пееше најубавите зборови на нашиот јазик“, напиша тој на Твитер.
Францускиот весник „Фигаро“ објави дека Биркин во изминатите неколку години страдала од здравствени проблеми што ја спречувале да настапува и нејзините јавни настапи станале ретки. Во 2002 ѝ беше дијагнозирана леукемија, а во 2021 доживеала благ мозочен удар. Во март годинава ги откажа своите настапи поради повреда на рамото. Подоцна во мај потврди дека нема да се се врати на сцената и дека ѝ треба уште малку време, Им вети на своите фанови дека ќе ги види повторно на есен. Но, за жал вчера беше пронајдена мртва.
Нема коментари