За прв пат во историјата, некои од најголемите модни куќи во светот ги водат жени. Успешни, талентирани и посветени на еманципацијата на жените. Жените дизајнери и основачки на брендови не е нешто ново, но новина е кога жени за прв пат беа поставени на позицијата на креативен директор во двете париски модни куќи со историја од повеќе децении. Марија Грација Кјури во 2016-та стана прва жена кретивен директор во 73-годишната историја на куќата основана од легендарниот Кристијан Диор. Соочена со богатото наследство на Диор, таа лесно можеше да ја присвои препознатливата женствена естетика, но сакајќи да остави свој, женски потпис, таа во првата колекција ги охрабри жените, се обрати за нивна еманципација и рамноправност, и на пистата ги испрати манекенките во маички на кои е испишано „Сите треба да бидеме феминисти“. Марија Грација покажа цврст став и комплетна спремност за местото на креативен директор во една од најмоќните модни куќи.
Уште една жена привлече внимание – Клер Вејт Келер во 2017 година стана креативен директор на модната куќа основана од Ибер де Живанши, и како и Кјури, и таа е првата жена на оваа позиција во 67-годишната историја на куќата. Таа веќе беше позната и ценета дизајнерка, но клучната позиција ѝ донесе нова димензија во нејзината работа, а шест месеци по ангажманот во Живанши доби задача која ѝ донесе светска афирмација – да го креира венчалниот фустан на Меган Марк на кралската свадба со британскиот принц Хари, свадбата која што во живо ја гледаа околу 2 милијарди луѓе во светот.
Кјури и Вејт Келер упешно се снаоѓаат во улогите на моќни креативни директори. Нивниот успех не е преку ноќ, зад нивните последни достигнувања стои долг пат на напорна работа и искуство, а сега и голема одговорност во создавањето нови креативни поглавја во Диор и Живанши.
Покрај овие две дизајнерки да ги споменеме и Сара Бартон, креативна директорка кај Александар Меквин, потоа Фиби Фајло со искуство во Селин и Клое, дизајнерките кои основале свои брендови Мијуча Прада, Реи Кавакубо, Вивиен Вествуд и многу други, кои не само што креираат, туку и го менаџираат комплетниот креативен дел, неретко и бизнисот.
На макеодонската модна сцена забележуваме дека во последните години доминираат дизајнерките, некои од нив со повеќедецениско искуство и сопствени бизниси, други од поновата генерација и во постојан подем – Росица Мршиќ, Тања Кокев, Лидија Георгиева, Силвија Михајловска, Антонија Ристовска, Јована Филиповиќ, Олгица Ѓоргиева, Ивана Кнез, Ирина Тошева, Нела Тодоровска… многу млади креаторки и новоосновани брендови, како во креирањето облека, така и во создавањето накит и ракотворби.
*Не е дозволено пренесување на содржината на www.stylist.mk без одобрение на уредништвото. При објавување на материјали од модниот сајт www.stylist.mk, во други медиуми задолжително наведете го изворот од кој е преземен текстот и поставете хиперлинк. Цитирањето и објавувањето на линкот е задолжително, во спротивност ќе подлежите на правни мерки.
Нема коментари