Уредничките на Stylist.mk и гости од Британија ќе одржат предавања на Моден викенд-Скопје

Под називот „Современи движења во модата-трендови, продажба и блогирање“, уредничките на Stylist.mk и гости од Британија ќе одржат предавања на Моден викенд-Скопје, на 25 октомври од 12 до 15 часот во „Станица 26“.  Како дел од едукативната и бизнис програма на есенското издание на Моден викенд најавени се излагањата на британските модни експери:  Роберт Кавел- Кларк, Кендал Робинс и Ребека Рој, како и на македонските модните новинарки/уреднички со долгогодишно работно искуство во областа на модата: Катерина Трајановска и Ана Несторовска од модниот сајт Stylist.mk.

Роберт Кавел – Кларк, кој е одговорен за односи со дизајнери и скаутирање во „Not Just a Label“, ќе предава за профилот на компанијата, нивните искуства со интернационални дизајнери, современи начини на продажба и финансирање на нивниот бизнис. Роберт Кавел-Кларк ни гостува со поддршка на Министерството за култура на Р.Македонија. Како програмски менаџер во Британски совет Лондон, Кендал Робинс пред македонската публика ќе говори за работата на Британскиот совет, нивната меѓународна соработка и искуствата со дизајнери од Велика Британија. Робинс води и курира културни настани и изложби низ Блискиот Исток, Северна Африка и Јужна Азија, како и во Обединетото Кралство, а исто така е и советник за меѓународната работа. Кај нас ја носиме во соработка со Британски совет во Македонија.

Ребека Рој од 23 до 27 октомври во Скопје ќе ја одржи работилницата  „Модно блогирање“ за модни блогери и фотографи

Британски совет во Македонија ни ја носи и Ребека Рој која е една од врвните лондонски модни стилисти и креативни консултанти, моден директор на списанието „Disorder“ и моден уредник за Обединетото Кралство на списанието „The Untitled Magazine“. Таа од 23 до 27 октомври во Скопје ќе одржи работилница наречена „Модно блогирање“ наменета за модни блогери и фотографи, но ќе зборува и за начините на кои дигиталните технологии и друштвените мрежи може да го помогнат развојот и промоцијата на модниот бизнис.

Уредничките на Stylist.mk ќе зборуваат за „Улогата на интернет-медиумите во македонската модна сцена“

Трајановска и Несторовска од  Stylist.mk ќе зборуваат за „Улогата на интернет-медиумите во македонската модна сцена“ и ќе господелат своето повеќегодишно искуство како модни новинарки работејќи во различни медиуми на домашната сцена.

Рокот за пријавување на заинтересираните да присуствуваат на предавањата е до 20 октомври 2014 на goran@fashionweekendskopje.mk