Шоурум со ексклузивни парчиња од дваесет и осум претставници на седумнаесет различни земји, гостување со изложба на наградувана платформа за концептуален дизајн, како и ревиски претставувања на колекциите од млади и етаблирани имиња во земјата и регионот, сочинуваат само дел од програмата на претстојниот Моден викенд-Скопје што ќе се држи од 29 до 31 март во зградата на Европски универзитет (ЕУРМ).
Со свеченото отварање на шоурумот „United Fashion SEE“ во 18 часот, наредниот петок, 29 март, и официјално ќе започне 19-то издание на Моден викенд. Домашната публика, но и многубројните најавени гости и медиуми од странство, премиерно ќе имаат можност да ги погледнат најновите креации на 28 возбудливи и внимателно одбрани дизајнери и брендови од Европа.
Маја Кикириткова (фото. Мартин Саровски)
Покрај од земјата домаќин, своите колекции за сезоната есен-зима 2019/20, заеднички пред потенцијалните купувачи ќе ги изложат претставници на Белгија, Германија, Португалија, Франција, Романија, Латвија, Естонија, Грција, Турција, Бугарија, Словенија, Хрватска, Црна Гора, Босна и Херцеговина, Србија и Косово, а потоа истите ќе ги презентираат и со спектакуларен моден перформанс во зградата на Европски универзитет.
Иван Асен 22
На задоволство на филмските сладокусци, вљубениците во уметноста и пасионираните следбеници на модата во сите можни форми, уште една занимлива новина годинава е гостувањето на „ИВАН АСЕН 22“, платформата за концептуален дизајн од Софија. По презентациите во Бугарија, Австрија, Јужна Африка и Германија, во Скопје ќе прикажат микс на модна изложба и филмови. Организаторите на изложбата се добитници и номинирани за мноштво награди на престижни фестивали низ целиот свет, а пред пристигнувањето во нашата земја само кусо прашуваат: „ Каде е вашиот дом?“
Евгенија Зафировска (Фото: Tone Bandits studio)
Во однос на ревиските претставувања, на Моден викенд ќе се претстават неколку колекции. Откако се врати на модната сцена, Маја Кикириткова ќе настапи и на Моден викенд со колекција на нејзниот бренд „Елеазар“. Ревии ќе имаат Сара Реџиќ, брендот Anthropoda, Yllka Brada од Косово, потоа Евгенија Зафировска, Софија Урумовиќ, Марија Кулушиќ, Марко Фехер, Милан Зејак. Модно шоу ќе имаат и студентите на факултетот за Арт и Дизајн при Европскиот универзитет насловено „Ив Сен Лоран и јас“, како и студентите на Тхнолошко-металуршки факултет.
Нема коментари