Најдобриот готвач на светот, кулинарски визионер и сопственик на еден од најдобрите ресторани во светот, „Нома“ во Копенхаген, роден е токму во Копенхаген од татко македонски Албанец и мајка Данкиња. Кога бил мал со своите живеел во мал стан во главниот град на Данска, но како семејство од петмина и со мали примања, животот не им бил многу прекрасен. Затоа семејството одлучило да се преселат во Македонија, каде што ќе останат до почетокот на војната во Босна, по што се враќаат во Копенхаген. Рене често зборува за своето потекло, а во разговор заHaut de Gamme, повторно раскажува за животот во Македонија и напоменува дека овдешниот начин живот и храна многу влијаеле врз начинот на готвење и концептот на неговиот ресторан кој со години е на првото или второто место на најдобри ресторани на глобално ниво.
- Моите години поминати во Македонија оставија многу подлабоко влијание врз мене од данските години кои не беа толку добри. Не уживав во животот заробен во мал стан во лошо соседство, без вистински живот надвор од домот. Моите родители секогаш беа на работа за да заработат за нас и за помош на нашето семејство во Македонија. Се сеќавам дека во вечерните часови седевме со моите браќа во празна канцеларија и чекавме нашата мајка да заврши со чистењето. Живот во Македонија беше многу поинаков. Бевме во голема семејна куќа во која сите генерации живеат под ист покрив. Имавме двор, ниви, градини, животни, сами одгледувавме зеленчук и овошје – сето тоа силно влијаеше на мојот пристап во „Нома“. Создадов врски со земјоделците, почнав да трагам по храна која е вообичаена за Македонија – сите сега се во потрага по печурки, костени, шумски плодови … Исто така, мојот личен живот е под влијание на македонските традиции – мајката на сопругата живее со нас, ова обично не е обичај во Данска, но е одлично моите ќерки да растат со повеќе луѓе во домаќинството. Двете постари ќерки секоја сабота доаѓаат во „Нома“ и помагаат околу услигата. Тие тоа многу го сакаат! Ниедна роденденска забава или нешто друго ќе ги одврати од тоа задоволство. Но, се разбира, постои и данско влијание која е видливо најмногу во мојот менаџмент, во водењето на тимот и во концептот на отворен ресторан. Лидерството тука е поегалитаријанско, повеќе рамно – луѓето имаат повеќе слобода, но со тоа, исто така, повеќе лична одговорност.
Од каде произлегува љубовта кон храната?
-Тоа мојата македанска страна. Во времето на моето детство луѓето во Данска јадеа брза и храна подготвена во микробранова. Немам добри сеќавања во однос на храната во моето данско детство. Во Македонија беше поинаку. Таму имаше вистинска храна за појадок, ручек и за вечера. Се сеќавам на појадоците со леб смесен од баба ми, испечен од вујко ми, со домашен путер и јајца од нашиот кокошарник. Никогаш не пиемве Кока-кола, туку домашни вода од роза. Секој ден готвевме ручек. Станав размазен, во смисла дека се навикнав на одлична вистинска храна и тоа ми недостасуваше кога се вративме во Данска. Едноставно не можев да се навикнам на хот дог или други видови на брза храна. Знаете, некои би помислиле дека сме биле сиромашни во Македонија. Живеевме во куќа над тезга, можеби без сите добра на цивилизацијата, но за мене животот таму беше богат и исполнет. Бевме среќни.
1 коментар