Приказната за метеорски подем на Александар Меквин на врвот на модната индустрија и на неговата трагична смрт на 40-годишна возраст е предмет на новиот филм што го подготвува режисерот Ендрју Хеј, актуелен со филмот „45 години“ за кој Шарлот Ремплинг годинава е номинирана за Оскар за најдобра женска улога. Според првите информации сценариото ќе го работи познатиот драматург Крис Урч, ќе се користат делови од книгата „Крв под кожата“ (Alexander McQueen: Blood Beneath The Skin) од Ендрју Вилсон, а се очекува филмот да почне да се снима кон крајот на оваа година. Ли Александар Меквин, син на наставничка и на таксист, израснал во Источен Лондон и чиракувал во ателјеата на Севил Роу пред да се запише на познатата модна школа Сентрал Сент Мартинс и да ја лансира својата етикета во 1992 година. Работел како креативен директор на „Живанши“ (1996-2001), во својата кариера претстави повеќе, сега веќе епски колекции, стана признат од модната индустрија и публиката како еден од најинвентивните дизајнери на своето време, а на 11 февруари, 2010 година, Меквин изврши самоубиство во својот дом во Лондон.
Можеби ќе Ве интересира
Нема коментари