Саманта Камерон, сопругата на поранешниот британски премиер Дејвид Камерон, важи за една од најдобро облечените жени и затоа беше очекувано после политиччкиот ангажман на сопругот, да се впушти во моден бизнис и пред неколку месеци го најави својот моден бренд Cefinn. Деновиве почна да ги промовира парчињата од колекцијата, и Саманта веднаш наиде на негодувања поради цените – на пример една обична сатенска маица чини 110 фунти (8.000 денари). Потоа на Британците не им се допадна тоа што облеката ја нема во големи конфекциски броеви. А сега, како што пишува Daily Mail, реагираат затоа што скапите парчиња можеби се дизајнираат во Лондон, но се произведуваат во фабрики во Источна Европа каде што работната сила е многу евтина.
Весникот пишува како скапиот бренд на Саманта Камерон се произведува во Македонија каде што работниците земаат многу мала плата – 64 пени од час, односно околу 45 денари од час. Јавноста реагира дека облеката што ја дизајнира Камерон е многу обична, а толку скапа како „луксузна урбана униформа за вработените жени што ја сакаат модата“.
Во едно истражување на весникот Guardian од август минатата година се критикуваат западните брендови дека својата облека ја прават, меѓудругото и во Македонија каде што некои од работниците заработуваат по 45 денари на час, често работат прекувремено, во мрачни и понекогаш опасни услови. На етикетите на Cefinn стои дека производот е направен во Македонија, но весникот не наведува точно во која фабрика и не е познато колку таму заработуваат работниците.
„Текстилните работници во Македонија често работат прекувремено и земаат ниски плати. Брендовите од Велика Британија имаат одговорност кон луѓето што ја прават нивната облека, и треба да се осигураат дека работниците земаат пристојна плата“, смета Никола Раунд, од британската организација Labour Behind the Label.
На оваа реагираат и од Cefinn и лицето одговорно за односи за јавност од модниот бренд соопшти: „Фабриките кои соработуваат со Cefinn се во согласност со сите меѓународни прописи. Cefinn работи само со фабрики кои се целосно ревидирани. Имаме блиски односи со сите фабрики кои ги користиме и ги посетуваме редовно“.
Раунд стои на тоа дека ревизија на фабриките може да го покаже спротивното (со условите на текстилните работници кај нас сме сите запознати). Иако ревизиите генерално не се ефективни и не носат вистински промени за работниците, потребно е понатаму да се прават како еден од начините да се најде решение. Исто така, се очекува компаниите да ги поддржуваат работниците во нивните права да се организираат во синдикати.
Саманта Камерон во моментов ја промовира колекцијата на Cefinn, која содржи луксузни, но класични модни парчиња како фустани со едноставен крој, блузи и молив-здолништа, а парчињата од вчера се продаваат во стоковната куќа Selfridges во Лондон и онлајн на Net-a-Porter. Камерон како сопруга на британскиот премиер беше вклучена во британската модна сцена, беше амбасадор на Британскиот моден совет и своевремено агитираше дека треба да се поддржат домашните произведители. Но, поинаква е приказната кога се промовира сопствен бренд…
Нема коментари