Во рамките на модниот настан Скопски моден фестивал, кој се одржа викендов во Скопје сити мол, се претстави македонската дизајнерка Сефанија Насеска со колекцијата за пролет-лето 2022 насловена како ‘The Great’, инспирирана од Александар Македонски и целосно модно преведена и прилагодена на современите модни трендови. После ревиската промоција, оваа колекција е изложена во showroom-от на приземје во Скопје сити мол и тука до 27 март ќе биде достапна за сите вљубеници во модата.
-Оваа колекција е со посебно значење за мене бидејќи го одбележува десетгодишниот јубилеј од прикажувањето на мојата прва самостојна колекција. И токму поради тоа изборот за инспирација паѓа на лик кој според мене претставува моќ – вели Стефанија.
Колекцијата претставува восхит кон ликот и приказ на космополитски залагања и погледи на Големиот Александар кон светот, а поради јубилејната десетка во оваа колекција има елементи од секоја претходна.
-Доколку ме запрашате зошто токму Александар и таква скокотлива тема ќе одговорам дека уметноста и креативноста не препознаваат граници и според мене тој е лик со кој треба да се гордее цел Балкан. Прифаќање и почит кон различностите тоа е она кое нас како луѓе не прави големи или The Great – додава дизајнерката.
Токму тоа и го асоцира различноста и шаренилото на материјалите кои се инспирирани од античките мозаици. Како детали се среќаваат лавот и сонцето, а исто така и преовладува белата боја, овие и многу други елементи се заштитни симболи на античкото македонско кралско семејство.
-Дури и панделките во колекцијата не се ставени случајно, туку тоа е моден превод на тројните-дупли секири кои се симбол за авторитет. За колекцијата концептуално да биде издржана изработив ташни во форма на штитови со модерен ‘patchwork’ дизајн и шлемови во форма на лавовска глави –вели дизајнерка за својата колекција.
Нема коментари