В сабота, 4 ноември, во галеријата „Безистен“ во Штип на модна ревија и промотивен видео запис ќе се презентираат 11 модни брендови од Македонија и Бугарија во организација на македонскиот Текстилен кластер во соработка со Моден викенд Скопје. Станува збор за производите на македонските фабрики АСТИБО ФЕШН ГРУП, АМОР-КОМПАНИ, ИСТ КОМЕРЦ-САНДА, КУЛИ и ЛАРС, и бугарските БОДА СТАЈЛ, ВИТАЛ, ПИРОС, НОВ СВЕТ, МАРТЕКС 2 и ВАЛЕНА.
Ревиите се во рамките на пограничниот проект ‘‘Градење на интернационална конкурентност на текстилните компании во пограничниот регион МК-БГ‘‘ кој Текстилно Трговско Здружение – Текстилен кластер од Македонијаго спроведува во партнерство со Браншовата организација за текстил и облека од Бугарија.
„Целта на овој настан е да се подигне имиџот на текстилната индустрија преку промовирање на ТВ видео спот и преку заедничко претставување на колекции на текстилни компании од Македонија и Бугарија пред публика составена од државни и образовни институции, донорски организации и останати гости“, изјави Наташа Сивевска, извршен директор на Текстилен кластер.
На модната ревија компаниите ќе можат да ги презентираат своите брендови и да дадат краток преглед на нивните капацитети, како и општествената одговорност и етичкото работење кои ги применуваат во своите компании. Воедно на настанот ќе се промовира новиот ТВ-спот кој го изработи Текстилниот кластер во склоп на проектот, кој што ги покажува силните страни на текстилната индустрија и е наменет за привлекување на нов млад кадар во истата.
Проектот е финансиран од Европската унија преку ИНТЕРЕГ ИПА програмата за Погранична соработка помеѓу Македонија и Бугарија во соработка со Fashion Weekend Skopje – Модна агенција Подиум и поддржано од Дом на млади – Штип, Винарија Тиквеш, Музеј на град Штип и Хотел Оаза – Штип.
Нема коментари