Шпанскиот бренд „Зара“ ја претстави новата Studio колекција за оваа пролет, но и новиот пристап на купување наречен Augmented Reality (зголемена реалност). Овој новитет кој почнува да функционира од утре, 12 април, гарантира поинакво шопинг искуство – Zara Shop the Look in Augmented Reality. Како функционира? На мобилниот телефон треба да ја симнете Zara AR апликацијата, потоа телефонот насочете го кон излогот означен со графички ознаки во селектирани продавници, посебни делови во продавницата или на веб сајтот за е-шопинг, и моделите ќе „оживеаат“ на вашиот монитор.
Овој иновативен концепт значи користење најсовремената технологија во малопродажба. На почетокот ќе значи привлекување на нови купувачи, потоа купувачот ќе може да го купи изгледот во продавница или да го нарача директно од телефонот. Засега оваа опција е возможна во 120 продавници во светот, за жал не и во скопската продавница на „Зара“, а најблиску може да ја пробате во Грција или Хрватска.
Благодарение на Zara AR апликацијата на вашиот телефон ќе ги видите виртуелните модели како се движат, позираат и се вртат додека ја носат новата Studio колекција. Сите креации може да се купат со клик на „shop the look“ копчето во апликацијата или во продавнцата. Исто така апликацијата дозволува снимање и фотографирање и потоа споделување на социјните мрежи. Еве ја и новата Studio колекција богата со бои, шари и етно референци.
*Не е дозволено пренесување на содржината на www.stylist.mk без одобрение на уредништвото. При објавување на материјали од модниот сајт www.stylist.mk, во други медиуми задолжително наведете го изворот од кој е преземен текстот и поставете хиперлинк. Цитирањето и објавувањето на линкот е задолжително, во спротивност ќе подлежите на правни мерки.
Нема коментари