Зборувавме дека боите не треба да се гледаат низ призмата на модните сезони и се договоривме дека нема летни и зимски бои, но не можеме да го негираме фактот дека многумина црната ја сметаат за типично зимска боја. Црната во исто време е и најпопуларната боја во модата. Дизајнерите ја вметнуваат скоро во секоја своја колекција, бидејќи таа нуди разноликост, одговара на секого и на сечиј тен, се комбинира буквално со сè и се вклопува во различен стил. И е соодветна за секоја пригода – од работа во канцеларија во вечерно излегување.
Црната е мистериозна, таа е боја и на моќ и на тага. Боја на поезијата. Од црната Коко Шанел го направи славниот мал црн фустан и создаде класика во модата, а некои модни дизајнери како Рик Овенс и Јоџи Јамамото често креираат само во црна боја. Но, за некои облеката во црна боја е едноставно досадна, мрачна и не нуди фантазија. Но, црната гардероба не мора да е монотона, црната често отвора големо поле за експериментирање со кроеви, текстури и силуета. Како некое празно платно на кое се пресликуваат смелите визулени одлуки.
Во црно најчесто се обоени зимките капути, но ако не ве задоволуваат оние со едноставен изглед, бирајте модел со впечатлив крој и волуменозни раменици. Експериментирајте со пропорциите, па одберете широки палта, облека со предимензионирани и пуф-ракави и капути дефинирани со широки ремени. Зимава трендсетерките сакаат да носат црни топли јакни со потпис на Прада, како и црни гломазни чизми. Понекогаш во комплетно црната приказна се вклучуваат и парчиња во сива и бела боја.
Нема коментари