„Џејн“ е модна приказна за слободниот дух на АТАМИ и Gaya

Од Ана Несторовска · На април 14, 2014

Милена Атанасова, дизајнерка и модел на колекција Фото: HLVK by Goran V. Popovski

Облеката оживува кога е носена. Така, ставена во контекст на визуелната порака на индивидуалецот се менува и станува личен израз. Целта на АТАМИ и Gaya е да создаваат нослива, безвременска облека која дозволува игра и бесконечно многу комбинации и за разни пригоди…. Со овие зборови младта дизајнерка Милена Атанасова ја почнува приказната за новата колекција „Џејн?!.. ?“, која ја создаде под својот бренд АТАМИ, во соработка со своата колешка Милјана Атанасова (Gaya).
-Џејн е хедонист и има слободарски дух. Љубопитна е и смела и не се става себе си во шаблон. Таа е црно и бело и сè помеѓу! Диво и кротко, брзо и спокојно… Таа е посебна приказна… Тоа се жените кои нè инспирираат и за кои работиме. До називот на линијата дојдовме благодарение на нашиот пријател Јован. На целиот муабет за колекцијата рече: Џејн?!… Така и стигнавме до НЗС за нашата инспирација, клиент и фотосесија-вели Милена.
При создавањето на моделите никогаш не се водат по моменталните трендови, бидејќи тие имаат многу кратко времетраење, за разлика од светските модни тенденции кои пред сè ги чувствуваат.
-Сè околу нас, на светско ниво, всушност и ги обликува тенденциите. За колекцијата тргнавме од женствено, чисто, игриво, контрасти кои се и суштината на нашата соработка воопшто. Користевме природни материјали, памук, лен, кепер, убави женствени кроеви кои даваат комфор и суптилен сексапил. Игравме со бои, јаки и заситени, неон и принтани материјали. Веруваме дека направивме парчиња облека кои може да се вклопат во гардероберот на секој индивидуалец-вели таа.

Милјана Атанасова, која стои зад брендот Gaya Фото: HLVK by Goran V. Popovski

За „Џејн?!.. ?“ направија фотосесија, благодарејќи на многу нивни пријатели кои им излегле во пресрет во вистинско време.
-Фотограф беше младото момче со голем потенцијал Горан Поповски, кој фотографира под името HLVK by Goran V. Popovski, а зад шминката стои Јелкица Поповска. Заради икс причини, повторно се ангажиравме себеси за модели. JОваа мини колекција е лимитирана едиција и секое парче се појавува еднаш до два пати. Достапни сме на нашите е_меилови, fun страните на социјалната мрежа Facebook, во подготовка се блоговите на Google, нашата виртуелна продавница на Etsy.com и во најава е нашето студио…Би в и најавиле супер дводневна дружба во МКЦ, на почеток на мај-додава таа.

Покрај истото презиме, Милена и Милјана ги врзуваат професионалната соработката и пријателството Фото: HLVK by Goran V. Popovski

ATAMI и Gaya ги врзуваат љубовта и спротивностите. Микс од остро и меко, контрасти, спој на спротивности. Прво заедничко им е презимето, а потоа и сличните имиња, природата, љубовта кон уметноста, модата и убавото воопшто.
-Убаво е што научивме нашето долгогодишно пријателство да го држиме на страна од нашиот професионален однос, работата бара дискусија и некогаш нашите спротивности не доведуваат до конфронтација, што во нашиот случај е конструктивно, на крајот секогаш доаѓаме до заедничка средина. Нашата најзначајна заедничка работа е всушност ова, нашиот заеднички проект ATAMIGaya, кој се надеваме ќе донесе уште многу колекции. Секоја нова приказна, за нас е нов предизвик. За следната колекција ќе ви најавиме дека ќе е ЕКО. Ќе играме со многу интересни техники на бојадисување на материјал кој не е хемиски доработен и сето ова дополнето со рачно сликање, везови и принтови.
ATAMI напоредно работи и со Em Ellephantski на разноразни мали спатки задоволства и аксесоари кон домот.