По летната пауза „Јавна соба” продолжува со циклусот тематски вечери и работилници „Вкусот на Скопје”, а на 6 септември на мени е белгиската кујна приготвена од Белгиецот со македонско потекло Марк де Јонг
Храната е еден од најзначајните елементи на белгиската култура. Фактот што во Белгија има најмногу сконцентрирани ресторани со Мишелин ѕвезди во Европа, укажува на вистински познавачи на добра кујна и хедонистички став кон животот. Белгијците генерално преферираат големи порции на добро зготвена, налик домашна храна (по македонски манџа). Земјата е лингвистички и културно поделена на два дела и тоа значитално е изразено во поглед на храната. Фламанскиот дел е под влијание на холандската и другите северни кујни, а Валонија е целосно изложена на француски стилови на готвење, односно храна со повеќе интензивни сосови и зачини. Месото, рибата и компирот се сметаат за основа на белгиската кујна, но десертите и чоколадите се нивна специјалност. Покрај добро познатите белгиски пива (Leffe, La Chouffe, Duvel и други) кои дневно се козумираат во хектолитри, Белгијците имаат истенчен вкус и за вино. Белгија, како и Холандија, не е производител на вино, но е огромен вински конзумент.
Марк де Јонг подготвува храна во „Јавна соба“
Белгиецот Марк де Јонг за оваа пригода со тимот на млади готвачи од „Јавна соба“ подготвуваат едно типично белгиско мени: супа од зеленчук со крцкава сланина, гратинирана цикорија со шунка и кашкавал во бешамел сос, телешка карбонада со белгиско „ступм” пире и познатата бриселска шеќерна торта. На овој начин опфатена е храна од сите 3 региони во Белгија.
Пoвеќе информации за целиот настан може да се најдат на: http://publicroom.org/landingpages/belgian-dinner-at-public-room.html
„Јавна соба” во сезоната есен-зима 2016 ќе претстави 8 тематски вечери и работилници за храна во соработка со повеќе компании, амбасади и бизнис центри. Целта на сите овие кулинарски настани е да се внесат што повеќе новитети и да се подигне нивото на гастрономијата во земјава, односно да се освежи домашната кујна.
Бриселска торта
Нема коментари