Џорџина Чепмен, дизајнерката и косопственичка на модниот бренд „Маркеза“ соопшти дека се разведува од сопругот, продуцентот и еден од најмоќните личности во Холивуд, Харви Вајнстајн, откако конечно се разоткри она што со години беше јавна тајна во филмскиот град – Вајнстајн сексуално напаѓал и злоставувал познати актерки, водителки, манекенки и вработени во неговата The Weinstein Company. Разотркивачката сторија беше објавена пред неколку дена во „Њујорк тајмс“, заедно со изјавите на актерките Ешли Џад и Роуз Мекгован како првите што јавно истапија со обвинувањата.
Се смета дека во кариерата и подемот на брендот „Маркеза“ Вајнстајн ги употребил своите врски во Холивуд. Бројни актерки на црвениот килим носеа креации токму на неговата сопруга Чепмен. Но, по обвинувањата на Вајнстајн, Џорџина вчера изјави дека ќе се раздели од продуцентот за кого се омажи во 2007 година, можеби и како нејзин обид да го спаси брендот. Џорџина всушност на почетокот застана стопроцентно зад сопругот, но после пет дена, откако ги виде проропорциите на обвинувањата, соопшти: „Срцетo ми се крши за сите жени кои претрпеле огромна болка поради овие непростливи акции. Одлучив да го напуштам мојот сопруг“. Времето ќе покаже дали нејзиниот бренд „Маркеза“ ќе го преживее сево ова без конекциите и финасиската помош од Вајнстајн, но и дали од морални причини брендот ќе ги изгуби клиентите.
Во деновите после објавувањето на тектот во „Њујорк тајмс“ дејствијата на Вајнстајн ги осудија големите холивудски ѕвезди, некои веднаш, но некои како Мерил Стрип и Никол Кидман малку и задоцнето. Отворено за малтретирањата проговорија Анџелина Џоли и Гвинет Палтроу, Розана Аркет и Мира Сорвино признаа дека нивните кариера отишле по надолна линија откако не ги возвратиле сексуалните желби на продуцентот, а актерката Азија Аргенто дури и го обвини за силување. Џоли изјави дека после злоставувањето одлучила никогаш повеќе да не снима филмови со компанијата на Вајнстајн, и ги предупредувала сите што работеле со продуцентот за неговото однесување. Поради страв многу жени криеле за мобингот, но во последниви денови се охабрија и споделија своите приказни. Нивниот број од ден на ден расте.
Шокантно е што њујоршката модна дизајнерка Дона Каран застана на страната на Вајнстајн, дури и кажа дека „жените сами си го бараат со начинот на кој се облекуваат“. Поразително е што овој „обвини ја жртвата“ наратив доаѓа од жена и од дизајнерка што ги облекува жените. „Погледнете како денес жените се облекуваат и како се претставиваат. Што бараме? Дали сами си го бараме презентирајќи се на сензуален и сексапилен начин?“, изјави таа напоменувајќи дека Харви и Џорџина се прекрасни луѓе. Подоцна, после негодувањето на јавноста и повикот да се бојкотира нејзината облека, се обиде да се оправда и се извини ако некого повредила, и рече дека сексуалното злоставување е неприфатливо, и тоа е проблем за кој конечно треба да се зборува.
Холивуд три децении ги прикриваше мрачните тајни на Харви, за осуда е што ѕвездите толку долго молчеа, многу е веројатно дека знаеле што случува (Гвинет изјави дека после еден напад тогашното момче Бред Пит му се заканил на продуцентот, но актерката сепак продолжила да соработува со Харви и заедничкиот филм „Вљубениот Шекспир ќе ѝ доенесе дури и Оскар), но не знаеме колкава била неговата моќ и какви спогодби се правеле за да бидат тивки и какви закани добивале доколку не се. И колку пари потрошил на сметка на тие спогодби.
Харви доби отказ од својата продуцентска куќа, осуда и од Клинтонови и од Обама, а демократските политичари сумата што им била донирана од продуцентот во нивните кампањи, тие сега ги насочуваат кон хуманитарни акции. Што е најважно, после години молчење и вртење глава на дејствијата на продуцентот, се отвора темата на сексуални малтретирања и мобинг, со надеж дека во Холивуд конечно ќе биде ставен крај на какво било искористување од страна на моќниците на Холивуд. Од сега па натаму никој веќе нема да смее да се однесува како Вајнстајн, да се обвинуваат жртвите и повеќе не смеат да се одмолчуваат ваквите инцидентни. А Харви веројатно не е еднинствен, во Холивуд постојат многу Харвиевци кои ја користан моќта на ваков одвратен начин и очекуваат жените да им бидат сексуално достапни. Време е да се разобличат.
*Не е дозволено пренесување на содржината на www.stylist.mk без одобрение на уредништвото. При објавување на материјали од модниот сајт www.stylist.mk, во други медиуми задолжително наведете го изворот од кој е преземен текстот и поставете хиперлинк. Цитирањето и објавувањето на линкот е задолжително, во спротивност ќе подлежите на правни мерки.
Нема коментари