Некои модни парчиња се класика кога е деловниот дрескод во прашање, црни панталони, сако, бела кошула и молив-здолниште се најчестиот избор во корпоративниот свет и тие се прилагодени за сите величини и облици на женското тело. Но, што кога сакате малку да ја разиграте деловната облека и да вметнете нешто трендовско? Како да изберете нови парчиња, а тие да му ласкаат на вашето тело и да ги следат правилата за дрескoд во вашата фирма? Еве неколку примери и совети.
АКО ИМАТЕ ГРАДБА БЕЗ ОБЛИНИ, ПРОБАЈТЕ КОШУЛА СО КАРНЕРИ Волуменот на набраната блуза визуелно додава заобленост на вашата рамна фигура. Кога кошулата е пикната во панталони со висок струк, ја дефинира половината и создава убав контраст помеѓу горниот и долниот дел, со што вашата фигура изгледа помалку правоаголна.
АКО ИМАТЕ ФОРМА НА ПЕСОЧЕН ЧАСОВНИК, ИЗБЕРЕТЕ ФУСТАН СО ЅВОНЕСТИ РАКАВИ Веќе знаете дека молив-здолништата и фустаните со рамен крој добро одговараат на вашата фигура, но дали некогаш сте размислувале дека ракавите би можеле уште подобро да му ласкаат на вашиот облик? Изберете фустан со ¾ ракави во форма на ѕвоно кој вниманието го насочува на половината и визуелно ги истенчува рацете.
АКО ИМАТЕ ОБЛИК НА КРУША, ОБЛЕЧЕТЕ БЛУЗА СО ЧВОР ВО ПРЕДНИОТ ДЕЛ Кројот на блузата ја акцентира половината во најтенката точка. Само додадете пошироки панталони, на пример со килот-крој, со што ќе го издолжите долниот дел од телото и ќе ги „намалите“ колковите.
АКО ИМАТЕ ГОЛЕМИ ГРАДИ, ИЗБЕРЕТЕ ПАНТАЛОНИ СО ПРИНТ Облечете комбинација во која нозете ќе ја имаат главната улога и ќе го одвратат вниманието од бујниот граден кош. Тоа најдобро ќе го направите со панталони со впечатлива шара, а во горниот дел облечете едноставна, еднобојна блуза. Премногу јака боја или шарена блуза во горниот дел уште повеќе ги нагласува градите и може да изгледа вулгарно и непрофесионално.
АКО СТЕ ВИСОКИ, ПРОБАЈТЕ СВИЛЕНКАСТ КОШУЛА-ФУСТАН СО СРЕДНА ДОЛЖИНА Ваквиот крој и свиленкастата ткаенина многу добро паѓа кај жените што се високи. Најдобро е да се избере средна должина, внимајте фустанот да не е многу краток, и ако има шлиц од страна, тој никако да не е висок (така ќе открива повеќе од што треба и ќе си имате проблем со одделот за човечки ресурси).
АКО СТЕ СО СИТНА ГРАДБА, ИЗБЕРЕТЕ КРЕАЦИЈА ВО ВИД НА КОМБИНЕЗОН Комбинзоните создаваат долга линија и визулено додаваат висина на вашата градба, но вие изберете креација која потсетува на комбинезон, но е со одделни парчиња – вака ќе може да ги контролирате величината и кројот на горниот дел и на панталоните. Поради ситната градба и кратката висина, комбинезоните што се продаваат во бутиците се или пешироки во горниот дел или со предолги ногавици.
*Не е дозволено пренесување на содржината на www.stylist.mk без одобрение на уредништвото. При објавување на материјали од модниот сајт www.stylist.mk, во други медиуми задолжително наведете го изворот од кој е преземен текстот и поставете хиперлинк. Цитирањето и објавувањето на линкот е задолжително, во спротивност ќе подлежите на правни мерки.
Нема коментари