Правилата за тоа што да носите на работа знаат да бидат мошне стриктни, особено во одредени професии со строго зацртан деловен дрескод, но често правилата се менуваат и прилагодуваат. Едно истражување покажало дека расте процентот на компании кои го присвојуваат полежерниот начин на облекување во канцеларија, а во некои држави дури и со закон се забранува правилото за задолжително носење на високи потпетици на работа. Секако, ова не значи комплетно олабавување и доаѓање со тренерки на работа, туку одредено внесува на свежина во деловната облека и комбинации кои излегуваа од досадниот и конзервативен професионален дрескод.
Деловен костим во боја + кошула во боја + ниски чевли
Црниот костим е толку клише. И досаден. Можеби е практичен и лесно се комбинира, но кога сакате да покажете повеќе автентичност изберете деловен костим во боја. Доколку интензивните бои се премногу интензивни за во посериозна канцеларија, изберете посмирена боја или на пример пастелни тонови, како сива или трендовската валкано розова. Дополнете со кошула во контрастна боја и со ниски чевли како мокасини или модел со шпиц.
Шарено здолниште + кошула со необичен крој
Време е за нова верзија на молив-здолништето – со шара. Но избегнувајте ги крупните шари на цветови и геометриски форми, туку бирајте модели со ситен принт – некоја смирена апстрактна шара или на пример коцкестиот gingham принт кој е тренд. Здолништето може да има нежен карнер, уште едно повикување на актуелните тенденции, а се комбинира со еднобојна кошула со малку понеобичен крој. Или пак со класична кошула за во канцеларии со построг дрескод.
Елегантно сако + широка кошула + фармерки
Сакото и понатаму е класика за во канцеларија. Но може да се носи во осовременета верзија, како на пример онаа на карираното сако со сиви или бежови тонови кое е хит сезонава. Исто така кежуал фармерките може да ги замените со панталони со едноставен крој.
Нема коментари