До пред десетина години Македонците заинтересирани за моден дизајн едукација бараа во интернационалните модни школи, сè додека во Македонија не почнаа да се отвораат студиски програми на оваа тема. Во следниов период ќе направиме преглед каде може да се студира моден дизајн и сродни програми кај нас, а денеска ви ги претставуваме студиите во рамките на Технолошко-металурски факултет во Скопје.
Институт за текстилно инженерство на ТМФ
Историја:Институтот за текстилно инженерство при Технолошко-металуршкиот факултет на УКИМ, е основан 1975 година и има преку 40 години искуство во едуцирање кадри за текстилната и модната индустрија во РМ. Од почетокот, па сè до 1999 година, во рамките на насоката „Текстилнo инженерство”, создаваше текстилни инженери. Од 2000 до 2012 година насоката беше преименувана во „Kонфекциско инженерство”.
Уписи: На 18 и 19 август 2016
Студиска програма:Во 2013 година, со доаѓањето од Париз на професорката Лидија Георгиева, е воведена нова студиска програма „Дизајн и инженеринг на облека”, во којашто концепција таа активно учествуваше. Студентите чиј број е во пораст секоја година, добиваат диплома како инженер по дизајн и инженеринг на облека. Со оваа научно наставна програма, тие се здобиваат со стручна основа која им овозможува да работат во сите сегменти на текстилната индустрија. На креативните предмети учат како да дизајнираат облека, а техничката наобразба им отвора врати во конфекциските компании.
Перспективи: Дипломците ќе можат да работат во текстилните фабрики кои произведуваат основни текстилни производи (плетенини, ткаенини, преѓи), да бидат модни креатори или да бидат моделари, но исто така ќе можат и да го основаат својот сопствен бренд, доколку тоа е нивната професионална определба. Првата генерација дипломци според новата програма ќе излезе годинава.
Дополнителни активности: Годинава беше одржана 17-та по ред завршна ревија. Со новата програма се воспостави традиција на тематски ревии, такашто првата година темата беше „Среќа“ следуваше „Планетата земја – нашиот дом“, минатата година темата беше Иднината е денес, а годинава предизвикот беше „Ритам“. (K.T.)
Фотографиите се од последната завршна ревија што се одржа минатиот месец на тема „Ритам“
Нема коментари