Македонската дизајнерка родум од Ресен, Геновева Кристоф, која неколку години гради успешна кариера во САД, викендов ја претстави својата нова колекција на модното шоу New York Fashion Week Benefit. Таа одушеви на добротворниот настан, што се одржа веднаш по завршување на официјалната ревиска програма на Модната недела во Њујорк.
- Чест и задоволсто ми беше по вторпат да учествувам и презентирам моја колекција во Њујорк, за време на модната недела. Посебна возбуда и атмосфера има во градот во овој период. Оваа сезона учествував во модното шоу New York Fashion Week Benefit, организирано од The Set NYC. Настанот не само што беше платформа за пласман на новите колекции на младите талентирани модни дизајнери, туку имеше и хуманитарен карактер. Шоуто имаше за цел да помогне во заштита на децата, да едуцира и да ја поддигне свеста за трговија со деца – вели Кристоф која открива дека поканата за учество на овој настан ја добила благодарение на објавата на фотографија со креација од новата линија на „Инстаграм“, што го забележале организаторите.
Геновева (четврта од лево) по ревија со моделите и гостите на настанот
Модниот настан се одржал во Челзи, Менхетн, во стара, запуштена, но убава црква, што допринело во несекојдневната атмосфера. Учествувале вкупно 12 дизајнери, од кои поголемиот дел ги изложиле своите креации, а само неколку одржaле ревии.
-Посетителите имаа време да се движат низ просторот и да ги разгледуваат парчињата облека и модните додатоци… Јас бев една од креаторите што презентираа, но мислам дека ги надминав очекувањата, па бев замолена моделите да ги претставам на модната писта и да бидат дел од ревијата-вели Геновева.
Во колекцијата доминираат јаките бои: розова (хот пинк) и разни розе свеликави транспарентни материјали, златната боја и апстрактен цветен материјал. Силуетите се инспирирани од 40-тите години.
-Дизајните го следат женското тело, а должината на здолништата и фустаните е до под колена. Исто така застапен е cape top (блуза со наметка) со панталони, препознатливо за 40-тите. На некои од дизајните има транспарентни розови панели. Дизајните се женствени и софистицирани. Од материјалите корисев растеглива металик свила, шифон, свилен сатен твил и микадо со преубав цветен дезен. Креациите ги надополнив со модни додатоци од мојата колекција, ласерски кожни белегзии во златна боја.
Кристоф вели дека ѝ се допаднало што настанот траел подолго и имала можност да контактира со посетителите.
-Имав можност на кратко да се запознам со Chef Roble (Готвачот Робл), кој има популарно реално шоу Chef Roble & Co на Bravo TV, Аминет од America’s Next Top Model и познатиот модел Шон Рос. Впечатоците од ревијата беа преубави и посебно ме радува што добив одличен фитбек од сите присутни на модниото шоу-вели таа.
Геновева се преселила во САД пред девет години за да биде со својот сопруг – Бени Kристоф, кој по потекло е Македонец, но е роден и живее во Kолумбус, Охајо. Двојката има две деца.
Има дипломирано на Kолумбус колеџ за арт и дизајн. По завршување на студиите добила ангажмани како моден дизајнер и илустратор. Работела и на концептуални решенија за големи брендови како „Викторија сикрет“, „Ралф Лорен“, „Армани“, „Блумингдејлс“ и „Лореал/Ланком“. Пред три години почнал да работи како независен дизајнер, а нејзиното прво модно шоу беше на Модната недела во Kолумбус. Пред две години учествуваше на „Дајет Пепси студио фешн шоу“ во рамките на „Мерцедес Бенц модната недела“ во Њујорк. Нејзин фустан исто така влезе во финалето на изборот „Адриана Папел за Е!“. Победничката креација од овој натпревар се најде на црвениот килим на доделувањето на наградите „Оскар“ во 2012 година.
Геновева Петреска Kристоф е родена во Ресен, таму има завршено основно училиште, продолжила во Средното медицинско во Битола и на крајот дипломира социјална работа во Скопје. Сепак, отсекогаш имала афинитети кон модата.
- Од мала бев заинтересирана за модата и цртав, но кога запишував на факултет во Македонија, немаше многу можности за дизајнери. Од таа причина решив да се запишам на социјална работа. Kога се преселив во Kолумбус имав шанса да почнам од почеток и решив да го студирам тоа за што отсекогаш имав интерес и страст – модата.
Нема коментари