Тимот на Hard to Explain со своите соработници и моделите по ревијата на 7 декември во Старата скопска чаршија
Се обоивте ли денес? Со ова прашање и симболиката на боите дизајнерскиот тим на македонскиот моден бренд Hard to Explain пред 10-тина дена ја промовира својата колекција за сезоната есен-зима 2013/2014. Во својот креативниот простор во Старата скопска чаршија, етикетата за урбана мода претстави 16 женски креации инспирирани од симболиките на боите, нивната функција и значењето. За линијата Катерина Попева и Марија Дацевска, кои стојат зад брендот, биле мотивирани од краткиот расказ на Војо Цветановски „Во паркот на боите“, кој раскажува за симболичноста на боите во животот на еден човек кој трага по обоеноста, како „бегство“ од реалното сивило.
- Во оваа кратка приказна ја препознавме новата зимска колекција и заедно со авторот на расказот влеговме во реализација на проектот ,,Се обоивте ли денес?“. Го замисливме како модна ревија и истовремено како уметничка изложба, која има за цел покрај модната линија да ја доближи и суштината на боите низ нивната симболика. Со тоа секој би се доближил поблиску до сопствената боја, онаа што ја има најчесто во неговата облека -велат Катерина и Марија.
Една од основните цели на оваа колекција е да се преслика, т.е доближи симболиката на боите до клиентите, како еден од основните двигатели во уметноста и во животот воопшто, кој е тесно поврзан со суштинато на секој поединец.
-Овој пат сакавме да направиме поинаков пристап кон целокупната идеја и реализација. Сакавме да излеземе од стандардниот начин на изработка на една колекција. Линијата е авангардна, но сепак носива. Секое парче може да се искомбинира на различен начин во зависност од пригодата. Клучниот израз што би ја дефинирал колекцијата е комбинација на разни дезени, тканини, игра со самите нив и рачна изработка-велат тие.
Колекцијата ја карактеризира и миксот на стилови, кои, сепак, ја потцртуваат женската елеганција, односно претставува повеќенаменски имиџ кој што може да стане допадлив за повеќе генерации.
Моделите се комплетирани со соодветни модни додатоци: чевли, чанти и накит. Застапена е целата палета на бои, соодветно на појдовната идеја за линијата. Како и во претходните колекции, користат природни материјали, како што се: волна, свила, кожа, чоја и памук.
-Понудата на тканини и матерјали на нашиот пазар е слаба, но сепак еден уметник треба да умее да твори со веќе понудените производи. Со матерјали буквално се снаоѓаме од секаде каде што ќе најдеме нешто квалитетно и интересно и како што знаете печатот на името Hard to Explain е и обработка на матерјали и тканини (цртање, везење, плетење) и експериметирање со истите, со што ги правиме препознатливи и по инвентивни.
Овие креативни девојки неколку години ја разработуваат етикетата Hard to Explain. Велат дека има многу значајни моменти како што се неколку самостојни ревии, презентации во рамките на Модниот викенд во Скопје, изработка на костими за представа,перформанси и секако надградување на самиот бренд.
-Идејата на брендот е да креира дизајнерска облека и модни додатоци, кои што ќе пратат добра конструкција, изработка, начин на презентација и целокупен стајлинг кој што ќе биде достоен за едно дизајнерско име на нашите простори, а се надеваме и надвор од нив. За сите овие години полека, но сигурно успеавме да стекнеме своја редовна клиентела која што го почитува нашето творештво.
Тие имаат и други соработници, најчесто дизајнери на додатоци, од кои во моментов актуелна е Катерина Микрут која работи под името Mikka Design. Со нејзе го делат ателјето Hard to Explain, но и промоцијата на новите колекции.
Покрај модниот дизајн Катерина се занимава и со држење на фит – пилатес часови, и со уште два члена- Јасна Лековска и Димитар Шавкуловски неодамна го отвори фитнес-студиото „Тринити“.
-Пилатесот и фитнесот ми се како втора професија и огромна љубов, и од хоби некако прејдоа во моја втора професија. Со добра организација и макотрпна работа успевам да посветувам време и да ги менаџирам двете работи, а притоа да нема некакви недостатоци во ниедна од нив-вели Катарина.
Нема коментари