Две млади девојки и идни дизајнерки Вера Ангелакова и Искра Младеновска своето видување за естетика го преточуваат на својот блог Aesthetics Illustrated, спој на фотографии со нивниот личен стил, следење на тенденции, белешки за домашните модни настани и нешто по што се единствени, објави со нивни модни илустрации. Често се дел од настани и проекти поврзани со блогерите од домашната сцена, а Вера неодамна се појави и во фотосесија во новиот магазин „Портрет“. За Stylist.mk открија дека и двете модата отсекогаш ги интересирала и привлекувала, поради што и двете запишуваат студии по моден дизајн, каде што и првпат ќе се сретнат. „Приказната на Aesthetics Illustrated започна сосема спонтано и емпириски“, ни објасни Искра, препознатлива по бујната црвена коса, како опозит на црната фризура со шишки на Вера. Љубителки на минималистички и експериментален стил, преку блогот презентираат една поинаква естетика и цел универзум кој се гради секојдневно поттикнат од разни инспирации, референци, омилени дизајнери, блогери, илустратори и домашни автори.
Искра Младеновска и Вера Ангелакова
Двете сте идни дизајнерки со интересна естетика, зошто одлучивте дел од креативноста да ја преточите во блог?
Вера: Блогот го сметам за глобално достапна онлајн изложба, на „крајот“, сите живееме и се информираме во „глобалното село“. Со Искра истовремено почувствувавме потреба за простор на кој ќе го презентираме она што го чувстуваме, учиме и знаеме, па блогот ни изгледаше како фина опција за визуелно презентирање. Естетиката ја градиме експериментирајќи со облеката преку идејата да споиме два карактера во еден. Така целиме кон заеднички правец.
Искра: Двете бевме во потрага по платформа на која би можеле да го промовираме својот личен стил, но и она што го сакаме да го работиме. Блогот ни изгледаше како совршено место за презентација, затоа што тоа е платформа на која секој од нас може да сподели нешто алтернативно, некоја варијација на некоја тема… Нуди безброј можности.
Вера и Искра често носат свои и креации на млади домашни дизајнери
До каде сте со креирањето облека, до кој степен на дизајнерска образба сте во моментов и што досега имате креирано?
Вера: Досега немаме претставено наш дизајн на облека на јавен настан, но во блиска иднина Ви ветуваме дека и тоа ќе можете да го видите. Сè што имаме креирано стои во универзитетскиот архив.
Каква содржина има на вашиот блог?
Искра: Ние го промовираме нашиот личен стил, ги презентираме и нашите вештини во областа на модната илустрација. Исто така се трудиме и да илустрираме и да пренесеме информации за дел од модните настани на кои се појавуваме – што воедно е идејата за блогерството. А ако се осмелите да ја погледнете (aestheticsillustrated.blogspot.com), тогаш ќе наидете на илустрации од нас облечени во сопствени креации и креации на нашите пријатели и идни колеги како Прокопие Каев, Леуарт Лека, Ирина Тошева, Мелани Дигит, Моника Ангелевска – сите одлични дизајнери.
Единствени сте по тоа што на блогот имате илустарции, дел од содржината наместо со фотографии ја прикажувате со илустрации, од каде и е идејата и кој ги прави цртежите?
Вера: Едноставно и двете ја сакаме модната илустрација, па поради тоа и немаше причина заради која не би илустрирале на блогот. Правиме илустрации за секој пост со аутфити, имаме илустрирано дел од модните настани на кои сме присуствувале и речиси секој четврток го обележуваме со текст од историја на мода, или актулените трендови кои после тоа ги илустрираме.
Дали имате некои примери од полето на модна илустрација?
Вера: Issa Grim, Garance Dorè, и секако безвременскиот Renè Gruau.
Кои блогови редовно ги следите?
Вера: The Rosenrot и The Haute Pursuit. Ги следам буквално сите од македонскиот блогерки круг.
Искра: Ги следам сите македонски блогерки, но посебно би ја издвоила блогерката Јована Зука која се истакнува со својот прочистен стил и естетика. Од странските пак, едни од омилените ми се Margaret Zhang и Vanessa Hong.
Се издвојувате и по својот прочистен личен стил. Како вие самите го опушувате стилот што го негувате и како го инкорпорирате секојдневно? Каде наоѓате облека?
Вера: Минималистички и експериментален. Во трка сум со време за да сошијам облека за мене.
Искра: Не би можела да го опишам својот стил со само еден збор, во својот плакар имам многу различни парчиња кои успевам да ги комбинирам и да создадам различни варијации. Љубител сум на облеката во „Зара“ и „Манго“, но не ретко знам и сама да си направам одредени парчиња.
Омилени дизајнери и брендови, како од светската, така и од домашната сцена?
Вера: Мене фаворити ми се Rick Owens, Rei Kawakubo… Меѓутоа најинспиративна и вонпланетска, што ме тера да мислам и креирам во моментот е дефинитивно Iris van Herpen. Од домашните не би издвоила фаворит, оние со кои што делиме слична аестетика ни биле, или се во план да бидат, соработници на блогот.
Искра: Од домашната сцена би ја издвоила Јована Филиповиќ, а од странската има многу дизајнери и модни куќи кои ги сакам, почнувајќи од Prada, Miu Miu, Saint Laurent, па сèдо дизајнерите како Alexander Wang, Rick Owens, Yohji Yamamoto, Bouchra Jarrar и многу други.
Со кого најчесто соработувате на блогот?
Вера: Aesthetics Illustrated е отворен за креативна размена на модна енергија во сите сфери во кои делува модата. Досега неколкупати остваривме соработки со млади дизајнери, фотографи и шмикери.
Искра: Соработувавме со Ерина Богоева, Ања Крстевска, Горан Поповски, Владимир Видановски, Мелани Дигит, Леуарт Лека, и секако со Прокопие Каев, Емануела Јосиф и Моника Ангелевска кои имаат голем распон на улоги – како дизајнери, фотографи, консултанти…
Секој четврток е време за #TrendyThursday, а една од последните обработени тенденции се пругите
Следите ли како се развива македонската модна сцена и што е она што најмногу ви се допаѓа?
Искра: Во последниве неколку години редовно ја следам македонската модна сцена која моментално е во подем. Бројот на млади и надежни дизајнери се зголемува, а тоа е всушност и она што многу ме радува.
Вера: На македонската модна сцена се чувствува креативен потенцијал, меѓутоа екпериментирањето со облеката е ограничено со буџет, со малиот пазар и со културата на облекување.
Кои според вас ќе бидат најактуелни трендови за пролет-лето 2016?
Вера: Деведесеттите и сè што оди со нив, чоукери, бомбер јакни, слип фустани, оверсајзд јакни, плетенки… За дел од овие трендови веќе пишувавме на блогот во делот #TrendyThursday.
Нема коментари