Модната илустрација и цртањето се негова пасија и окупација приватно и професионално. Покрај тоа што ги црта своите визии за модата, младиот креатор Алмир Мили наоѓа инспирација и во модели и комбинации од неговите колеги-дизајнери. Од неговиот молив и боици произлегле илустрации наменети за влијателни модни списанија како Elle, Teen Vogue, Lepota i Zdravlje и други. Најчесто ги црта своите фаворити од колекциите претставени на модните недели во Милано, Париз, Лондон и Њујорк. Но кусо по завршување на Модниот викенд-Скопје на Инстаграм се појавија и негови скици со креации од Јована Филиповиќ, Олгица Ѓоргиева и Ирина Тошева, како и на Антонија Ристовска, која неодамна, преку фотосесија ја претстави есенската колекција. Цртежите наидоа на позитивни реакции, како од неговите следбеници на оваа социјална мрежа, така и до самите креатори.
Илустрацијата на Алмир Мили инсоирирана од креација на Јована Филиповиќ, преставена на Моден викенд-Скопје
-Со оглед на тоа што Моден викенд -Скопје подолго време успешно ги спојува на едно место најдобрите македонски дизајнери, ми се роди идеја да почнам да работам на илустрации од моите омилени домашни креатори, кои воедно ќе ги презентирам на странскиот пазар. Премногу ги почитувам сите дизајнери на македонското поднебје и сметам дека треба да го покажеме нашиот талент надвор од границите на државата! Сметам дека сите учесници на Модниот викенд презентираа одлични колекции и би сакал да ги пофалам, пред сè младите и идни дизајнери кои беа одлични, како и организаторите на Моден викенд, кои секогаш им пружат максимална подршка. Конкретно од оваа сезона ги нацртав моите омилени аутфити од колекциите на моите колеги од ревијалниот дел на FWSK. Илустрирав и парче од новата линија на Ристовска, која иако оваа сезона не одржа ревија, бидејќи претпоставувам отстапува место на новите дизајнерски сили, како еден успешен професионалец во својата струка, сепак не можев да одолеам и решив да илустрирам и модел од нејзината колекција-вели Мили кој во неколку наврати и самиот учествуваше на Моден викенд Скопје.
Цртана импресија на Мили од креација на Олгица Ѓоргиева
Сериозно почнал да се занимава со модна илустрација по победата на натпреварот во цртање во организација на влијателниот магазин Elle.
-Како професионален моден креатор постојано цртам. Меѓутоа мојата работа како илустратор започна сосема спонтано откако победив на натпревар за модна илустрација кој го организираше Elle Magazine, за подоцна да започнам соработка со нивни регионални списанија, а потоа и со некои од светски ранг. Во слободно време постојано цртам. Тоа ми е хоби, кое можеби ќе прерасне во нешто поголемо во иднина! Веќе подолго време работам како моден илустратор за повеќе модни списанија меѓу кои и Elle Magazine, Teen Vogue, Lepota i Zdravlje и тн… Речиси секоја сезона од светските модни недели цртам илустрации од моите омилени дизајнери и омилените парчиња кои ги презентираат во Милано, Париз, Лондон и Њујорк. Досега имам добивано позитивни коментари и критики од DELPOZO, ARMANI JEANS и во главно од списанија со кои што подоцна имавме и соработка! Моите македонски колеги беа одушевени и почестени, а мене ми е многу драго што постојат и што ни нудат прекрасни парчиња облека секоја сезона-вели тој.
Фаворитот на Мили од новата линија на Ирина Тошева
Алмир се памети како победник на два конкурса на Модниот викенд Скопје, еден поддржан од „Пелистерка“, а вториот- ПОП! Мода во Американската амбасада. Во 2014 на оваа манифестација со перформанс ја престави линијата „Русалка“, а една година подоцна понуди мини колекција инспирирана од кампањата „Да ставиме крај на насилството врз жените и девојчињата –сега !“. Работеше на костимите од „Македонскиот Идол“. Имаше и ангажман како главен дизајнер за американскиот спортски бренд Di Biaggio New York. Моментално работи и на свои колекции кои му се дел од обврските во текот на постдипломските студии. Но вели дека сè уште е рано да излезе на пазарот на модата со сопствена колекција. Паралелно е дел од две академии и првично планира доградба на знаења за потоа да можае да ги спроведе професионално во бизнисот на мода.
-Професионалните ангажмани се обидувам да ги сведам до минимум во последно време, сепак приоритет ми се студиите, но во блиска иднина ме очекуваат успешни професионални ангажмани за кои ќе продискутираме во некоја наредна прилика-вели тој на крајот.
Цртеж со парче од есенската колекција на Антонија Ристовска
Мили направи илустрации за маици инспирирани од кампањата „Да ставиме крај на насилството врз жените и девојчињата –сега !“ во рамни на Моден викенд Скопје
Нема коментари