Приказната за потопот на библиските градови Содома и Гомора билa инспирација за новата колекција на битолскиот дизајнер Андреј Папаз Ѓоргиевски. Откако ја раскажа драматичната приказна за „антохеројот“, на 22 октомври (недела) се враќа на модната писта во Hotel Marriott Skopje со линијата „Подем на гревот“, со што ќе биде отворено 16-тото издание на Моден викенд Скопје (FWSK).
-Колекцијата е симбиоза на библиската приказна за Содома и Гомора, поврзана со блискиот исток, како денешна територија, каде што се смета дека се наоѓале овие два града и сето тоа спакувано во една современа форма окарактеризирана со провокативност и сексапил. „Подем на гревот“, како и темата и насловот на ланската колекција „Враќање на антихеројот“е провокативен, па по тоа може да се претпостави и каква ревија ќе следува. Минатата година си поставив некои свои лични стандарди, кои сметам дека оваа година и ќе ги надминам. Пред сè тимот на Моден викенд Скопје и мојата екипа будно работиме на самата организација за ревијата и сè она што попратно следи со неа. За еден ваков настан се разбира најважен е квалитетот на колекцијата, но не се изоставени и останатите елемнти за едно добро модно доживување. Музиката е препуштена повторно на Димитар Андоновски, а во цела звучна приказна се вклучени и светски музички имиња. Веќе постоечки мега хит е специјално адаптиран за ревијата со претходно доследно добиени авторски права. За рекламниот материјал се задолжени „Pixel print“, додека за дел од реализацијата се заслужни Министерство за Култура на Република Македонија, институтот за истражување во животната средина градежништво и енергетика „ИЕГЕ“ и „Симпекс“-вели Папаз.
*Препознатлив си по раскошните, театрални и секси креации. Кои се главните белези на новата колекција, дали остануваш доследен на својот досегашен стил на дизајнирање?
-Овој пат мислам дека ќе прикажам многу помрачна колекција, доколку би споредувале со ланската. Претежно е застапена црната боја, претставена во мат и сјајни варијации. Се појавуваат и сиви тонови, бела и цигла боја како освежување на целокупниот впечаток. Од материјали кои ги користев застапени се еко-кожа, свилен шифон, штоф, жоржет, скај и мрежа. Креациите го носат тој дух на раскош и драматичност.
*Дали се задржуваш на свечените модели и драматични коеви? За какви пригоди се креациите и на кој тип на жени им се обраќаш со новите дизајни?
-Колку и да сакав да побегнам од тие драматични моменти, неуспеав бидејќи веројатно тоа е моја ДНК. Колекцијата инсистира на инспирацијата од која е извлечена. Се работи за еден авангарден стил, составен од носливи и помалку носливи парчиња. Веројатно колекцијата ќе го најде патот до оние со нескротлив дух, спремни за експериментирање и гладни за внимание.
„Колку и да сакав да побегнам од тие драматични моменти, неуспеав бидејќи веројатно тоа е моја ДНК“-вели Папаз
*Твои креации и оваа година видовме на црвениот килим на значајни настани како Филмскиот фестивал Браќа Манаки во Битола. Кои соработки со јавни личности би ги издвоил како позначајни? Колку тие те инспирираат за создавање на моделите?
-Соработките со јавни личности се трудам да ги сведам на минимум. Дополнителен момент е дека сега за сега па и да немаме естрада, па така нема и со кого да се соработува. Како најголем успех од соработките би го издвоил Влатко Лозаноски за Евровизискиот настап во 2013 година па сè после тоа веќе не е предизвик, додека пак Филмскиот фестивал Браќа Манаки е друга приказна. Тука можеби е моментот кога се издавам дека сум локал патриот па тој повик не го одбивам.
*На какви проекти работеше во периодот меѓу двете учества на Моден викенд?
-Ден после ланската ревија бев ангажиран на претставата „Лазаревото писмо“, која ми е драг проект во штипскиот театар. Оваа година се нижеа и други проекти како што е „Тирамису“ во велешкиот театар во режија на Теа Беговска, „Интрига и љубов“ во Куманово и мојот најдраг проект веќе четврта година по ред „ 5+ Фамилија“ и „Nikoqiret“, серијата за Петко, која е најголем бренд меѓу децата во Македонија.
Папаз ги креира костимите за претставата „Тирамису“ во велешкиот театар
*Какви ти се плановите за „Подем на гревот“ по ревијата на Моден викенд Скопје? Дали ќе ја претставиш со фотосесија, или на некој друг моден настан, и каде ќе може да се набават моделите?
-Ланското искуство покажа дека воопшто не беше потребно да се сработи фотосесија, бидејќи колекцијата навистина беше доволно изрекламирана. Оваа година е планиран да се направи еден вид на моден едиторијал пред сè за мое лично задоволство, а други настани или изложби сметам дека не се потребни, пред сè поради стабилната платформа на Моден викенд Скопје. Колекцијата ќе биде достапна за online разгледување и ќе биде изложена во атељето на мојата колешка Викторија Арсовска.
*Оваа сезона Моден викенд ќе се одржи по мотото #Stopthetraffik – за запирање на трговијата со луѓе. Како и дали можеш, како дизајнер, да помогнеш во борбата против трговијата со луѓе?
-Позитивно е што во оваа глобална кампања, Моден викенд Скопје се вклучи со своја иницијатива преку ангажирање на овогодинешните учесниците за изработка на маички кои би ја подигнале свеста за оваа сериозна тема. Трговијата со луѓе и нивната злоупотреба е присутна насекаде низ светот. Тука не е исклучен и светот на модата каде експлоатацијата на работниците во модната индустрија за жал е присутна. Добар почеток е да станеме пред сè свесни за оваа состојба, а потоа преку кампањи и совесност да се бориме против тоа.
Ден после ланската ревија доби ангажиран да ги дизајнира креациите за претставата „Лазаревото писмо“
*Со оглед на ангажманите ти си на постојана релација Битола-Скопје. Каде имаш повеќе работни обврски и како функционираш на релација? Кои од овие града се поинспиративни и подобри за работење како дизајнер?
-На таа релација Битола-Скопје би додал уште неколку попатни станици поради работни ангажмани. Среќен сум што работам низ повеќе места во државава. Секој нов проект е ново искуство. Работните ангажмани претежно се сконцентрирани во Скопје, пред сè заради најблиските соработници. Среќа патувањето никогаш не ми било проблем, иако знае некогаш да ми биде напорно, на тоа гледам како предизвик, колку повеќе ангажмани, толку повеќе професионално се остварувам. А за тоа кој град ми е поинспиративен-хм, мината колекција беше цртана во Битола, а овогодинешната во Скопје, па вие процените.
Драматичната колекција „Враќање на антихеројот” ја престави на Моден викенд минатата година
Четврта година по ред работи на стајлингот на популарната детска серија „ 5+ Фамилија“
*Не е дозволено пренесување на содржината на www.stylist.mk без одобрение на уредништвото. При објавување на материјали од модниот сајт www.stylist.mk, во други медиуми задолжително наведете го изворот од кој е преземен текстот и поставете хиперлинк. Цитирањето и објавувањето на линкот е задолжително, во спротивност ќе подлежите на правни мерки.
Нема коментари