Школувана во Софија и во Барселона, кумановската модна дизајнерка Елена Спасовска од 2008 година успешно го гради сопствениот бренд, зад себе има работно искуство во Шпанија, повеќе појавувања на Моден викенд-Скопје, костимографски колекции и претставувања надвор од Македонија, а по пауза во творењето поради мајчинство, минатата недела ја претстави колекцијата „Математика“ на дизајнерско модно шоу во Lotus Design Store. Колекцијата е во монохроматска палета, во неа доминираат точки и линии предизвикани од темата, а содржи носливи и урбани парчиња како здолниште во облик на трапез, широки форми, трендовски комбинезон, кратки фустани со линии, кои лесно може да се вклопат во женската гардероба. Преку колекцијата Спасовска покрај модна визија даде и свој „глас“ преку поддршката на студентите и средношколците во нивната актуелна борба, испраќајки ги манекенките со пароли како #Поздрав Пленумци, но и со логични или нелогични математички равенки апострофирајќи ја логичноста и почесто нелогичноста за секојдневните ситуации.
>>По кратка пауза во творењето се врати на сцената и минатата недела ја прикажа новата колекција „Математика“. Кој е концептот на колекцијата и како математиката те инспирира за новите креации?
- Создавање на една колекција е математички процес од создавање на дводимензионални кројки според кои од материјалите создаваш комплексна тродимензионална форма. Математиката освен како процес во создавање на колекцијата ја вклучив и во геометриските шари, линии, и форми.
>>Сосема математички колекцијата ја почнуваш со точки и линии, откриј ни нешто повеќе за останатиот дел, за боите, материјалите, формите…
-Црната и белата го имаат главниот збор во оваа колекција, материијалите се лесни и природни наменети за летните денови, а формите ја следат инспиарцијата од геометриските тела.
>>Дел од манекенките носеа пароли за поддршка на Студентски пленум, каква порака сакаш да пратиш и сметаш ли дека модните дизајнери и уметниците воопшто треба да покажат ангажиран став и за теми кои не се модни?
-Модата по дефиниција е рефлексија на животот. Секој човек, а посебно уметниците треба слободно да ги искажуваат своите ставови. Со оваа ревија сакав да ги поддржам студентите и средношколците кои се борат не само за нив, туку и за доброто на идните генерации.
>>Кому се неменети новите креации, правиш ли проекција на целната личност додека ги создаваш и каде можат во моментов да се купат?
-Моделите се навистина носиви и со самото тоа целната група е доста поширока, во секој случај би сакала да се носени од личности кои имаат став и не се плашат да го изразат своето мислење. Сите модели се изложени и се продаваат во концептуалната продавница Lotus Design Store во Skopje City Mall, на вториот кат.
>>Кои се следните планови, на што ќе се сконцентрираш и како понатаму ќе го развиваш твојот бренд?
-Досега работев мини колекции од десет до дванаесет модели, мојот план е следното претставување да биде со целосна колекција која ќе биде дополнета и со аксеоари.
Нема коментари