интервју 0

ЕЛЕНА ТРАЈАНОВСКА: Моето време допрва доаѓа

Од Катерина Трајановска · На декември 2, 2014

Елена Трајановска за Stylist.mk фотографирана од Лепа Георгиевска во креација од Росица Мршиќ

Постои симпатична разлика од Елена Трајановска што ја запознав на почетокот од кариерата, кога заедно подготвуваме еден проект на модните новинари за Моден викенд–Скопје и едиторијал за „1Е Магазин“ и Елена по неколку години работа на меѓународен терен. Тогаш, во 2011 година ги направи првите чекори во манекенството и тоа под будното око на мајка и’ Рената, денес е веќе успешна во светски рамки и мошне пријатна и зрела 18-годишна девојка која е самоуверена дека нејзиното време допрва доаѓа. И тоа многу ме радува. Клучен момент е поддршката на Јелена Ивановиќ, поранешна српска манекенка со светска слава и модел-скаут и една од највлијателните во миланската канцеларија на Women Management. „Мојата кариера започна со Моден викенд-Скопје во 2011 година, кога бев забележана од страна на сопственичката на српскиот моден брендот „Мона“, Нада Момировиќ, којашто ја поттикна мојата сегашна менаџерка Јелена Ивановиќ да одржи кастинг во Скопје со помош на мојот матичен агент Алек Наумовски од модната агенција „Моделс Ин“,“ ни откри Елена. Всушност на тој кастинг Елена е единствениот избор на Ивановиќ, која подоцна ќе ја турне нејзината кариерата преку агенцијата Women која важи најдобра модна агенција во светот. Шест месеци подоцна следи нејзиното прво патување во Милано каде што учествува на ревии на модната недела, а веќе третиот ден од тоа нејзино прво патување ја доби првата голема работа за светски познатиот бренд Blue Girl. Потоа следат фотосесии за италијанските изданија на Glamour и Flair, подоцна Париз и учество на ревиите на висока мода, модна кампања за аргентинскиот бренд Inedita, а периодов е сконцентрирана на Њујорк. Во септември настапи на неколку ревии во рамките на Њујоршката модна недела, сними реклама за „Мерцедес Бенц“ која допрва ќе се промовира, но и едиторијал за виетнамското издание на Elle, лукбукови за Келвин Клајн и за „Сачин и Баби“. Елена признава дека позитивен елемент во нејзината кариера е поддршката од Алек и нејзината матична агенција „Моделс ин“, но грижливото водење на нејзината кариера од страна на Woman и њујоршката сестринска агенција Supreme. Да се работи за најдобрата светска модна агенција е одговорност, но и привилегија.Во минатите три години Елена соработуваше и со македонски дизајнери и публикации, учествуваше на модни ревии, сними каталози за Александра Митковска, Ристо Бимбилоски, „Лудус“, а во минатиов период беше дел од ревијата на „Елена Лука“ и се појави во едиторијал на Unique. Кога е во Скопје фокусирана е на Економскиот факултет, на помирен живот, на момчето Огнен, вежба и се негува во „Афродита С“, и додека го чека следниот повик за работа, знае и да сними некоја фотосесија со својот пријател, фотографот Виктор Наумовски.

Во модел на Лидија Геогиева во фотосесија на Лепа Георгиевска за Stylist.mk

>>Постојано го следиме секој твој чекор во професијата и забележавме дека периодов беше актуелна со снимањето рекламата за „Мерцедес Бенц“ и учеството на Њујоршката модна недела, па раскажи ни што уште сработи минативе месеци?

- Токму така, со огромно задоволство ќе соопштам дека бев дел од рекламата на „Мерцедес Бенц“ и учествував на Њујоршката модна недела. Исто така во првата недела од мојот престој во Њујорк успеав да сликам едиторијал за светски познатиот магазин Еlle, но и за американскиот магазин Relapse. На модната недела се појавив на осум ревии каде што чекорев со светски познати модели. Возбудливо беше да бидам дел од еден огромен проект на „Мерцедес Бенц“ и со нетрпение очекувам да излезе рекламата. Покрај тоа работев и многу каталози меѓу кој и оној за познатиот американски бренд „Сачин и Баби“.

Lookbook за американскиот бренд „Сачин и Баби“

>>Работеше во Милано, па се појави на модни ревии во Париз, а во последно време си сконцентрирана во Њујорк. Кој од овие градови најмногу ти легна? И како изгледа твојот њујоршки живот?

-Не сакам да кажам дека не уживав во својата работа додека бев во Милано и Париз, но мора да напоменам дека Њујорк е дефинитивно градот во кој најмногу се пронаоѓам себе си. На пазарот во Њујорк има премногу клиенти и модели, па така има доволно работа за сите, но доколку не си спремен да се бориш можеш да ги спакуваш куферите и да се вратиш од таму од каде што доаѓаш, бидејќи тој град нема време за чекање и секогаш има замена за секого.

На модните ревии на Нанет Лепор, Николас Кирквуд и Карен Вокер на Њујоршката модна недела во септември годинава

>>На своите ангажамни често ги среќаваш познатите модни дизајнери и популарни манекенки. Кој од нив ти остави позитивен, а кој негативен впечаток?

- Кара Делевињ на социјалните мрежи е доста позната како откачена девојка, но таа кај мене има оставено многу позитивен впечаток на приземна девојка, додека Наоми Кембел ми е одбивна поради нејзината ароганција.

Во креација на „Валентино“ во понов број на виетнамски Elle

>>Кој момент го сметаш за најуспешен во твојата досегашна кариера, а која задача најмногу ја посакуваш Што всушност значи да си успешен во светот на манекенкството?

-За најуспешни моменти во мојата кариера ги сметам сликањето за магазините Еlle и Glamour , онлајн-каталозите за Келвин Клајн, „Марни“, Александар Меквин, „Макс Мара“, ревија за Алвиеро Мартини, насловните за Flair и Fur. А најмногу посакувам да бидам на насловната страница на Vogue и дел од ревијана Роберто Кавали.

Дел од портфолиото на Елена

>>Градиш интернационална кариера и ретко прифаќаш ангажмани тука кај нас, но може да те забележиме на модна ревија и некоја фотосесија. Под кои услови прифаќаш да манекенска работа и што имаш периодов сработено?

-Модата во Македонија сèуште не е развиена, па така и менталитетот наш е многу поразличен од оној во странство. Сè додека не ја сфатат мојата вредност јас нема да прифаќам какви било модни анганжмани. Инаку по моето враќање бев дел од ревијата на „Елена Лука“ и работев на новогодишниот календар за 2015 година на винаријата „Бовин“.

1901803_10201239148215494_6531591724569813706_n

Од онлајн-каталог за Келвин Клајн

>>Манекенките треба да внимаваат на својата силуета и на здравата исхрана. Како се грижиш ти за овие нешта, како ги негуваш лицето и телото, како се храниш и кои се препораките од модните менаџери и твоите скаути во однос на овој дел?

-За мојот изглед се крижи Сузана, сопственичката на козметичкото студио „Афродита С“, а моите менаџери советуваат секојдневно да се вежба, да се пие многу вода и здраво за се ихранува.

На самиот старт на интернационалната кариера сними рекламна кампања за Blue Girl

>>Со кого од манекенскиот свет се дружиш најмногу? Кои ти се пријателите во Њујорк, и постои ли пријателство меѓу моделите или сè се сведува на ривалство?

-Се дружам со оние кои што карактерно ми одговараат, па затоа и мојот круг на пријатели во странство е тесен. Да, постои пријателство меѓу манекенките, но е многу ретко, бидејќи ривалството доминира.

Фотосесија за Александра Митковска

>>Работиш за најдобрата светска модна агенција Women Menagement. Колку е тоа важно да се застапува престижна агенција, особено во тинејџерските денови, агенција која се грижи за своите модели во секоја смисла?

-Најважното нешто за правилно развивање на кариерата на манекенката е агенцијата. Имам преголема среќа бидејќи од моите 15 години соработувам со светски најпрестижната модна агенција која се грижеше за мене кога се соочував со суровиот моден свет.

Инсерти од снимањето на реклама „Мерцедес Бенц“

>>Велиш дека твоето време допрва доаѓа, дека сега се развива твојата кариера. Па што е во план? Во јануари веќе повторно патуваш?

-Токму така, моето време допрва доаѓа! Сè што работев до сега беше само колектирање на искуство и припремање за мојот моден поход. Точно е и тоа дека во јануари ќе патувам, но сèуште е рано да откријам каде.

Фотосесија за магазинот Relapse

>>Дали манекенството отсекогаш ти беше сон или едноставно ти се случи?

-Уште од мала ми велеа дека сум многу убава и дека кога ќе пораснам треба да бидам манекенка. Мојата мајка додека растев ми раскажуваше за манекенките и полека ме насочуваше во таа насока. Манекенството ми беше сон уште од дете, па така со нетрпение чекав да пораснам.

Елена е една од ретките наши манекенки што учествувала на ревија на Париската недела на висока мода

>>Се чувствуваш ли дека осозреа побрзо од твоите врснички?

-Со тоа што кариерата ја започнав на мои 15 години и почнав сама да живеам во странство се чувствувам многу посозреана од моите врсници. Многу луѓе велат дека сум почнала со работа од многу мала и најубавите години од детството сум ги изгубила. Искрено, јас не се чувствувам така, бидејќи тоа само ми овозможи да бидам спремна за сèшто ме очекува понатаму.