Модната дизајнерка Маја Кикириткова Трајковски својата последна колекција ја претстави пред повеќе од пет години, во меѓувреме се посвети на работата во неколку наши модни куќи, на предавањето моден дизајн, како и на приватниот живот и се реализира како мајка на едногодишниот Лазар. Но, во еден момент почувствувала дека е време повторно да креира и сега се враќа на домашната сцена со модниот концепт спакуван во нејзиниот нов бренд Елеазар, свое ателје во центарот на Скопје и нова колекција за пролет–лето 2019, илустрирана преку фотосесијата што можете да ја погледнете на Stylist.mk. Овој камбек на Маја се должи и на нејзиното созревање како креатор на мода, што резултираше со подготвеност за градење градење нова модна приказна. Ја посетивме во нејзиното ателје за да ја погледнеме новата колекција и забележавме мала промена на стилот на дизајнерката, прочистени линии и модерна естетика, облека за урбана, самостојна и динамична жена, колекција во која што се мешаат црната и белата како задолжителни бои во ормарот со трендовските пастелни нијанси.
Направи неколкугодишна пауза од претставувањето сопствени колекции, што ти беше фокус за ова време и што те мотивираше да се вратиш на креирањето?
-Кога се роди син ми Лазар, повторно во мене се роди нешто кое ме мотивираше да продолжам да го градам сопствениот бренд, но овојпат ребрендиран и со поинакво име. Никогаш не престанав да творам, творев на лист хартија, творев за себе, за притали, само јавноста не го следеше сето тоа. Огромната поддршка од сопругот, кој е исто така виновен за ова што се случува денес.
Го претстави својот нов бренд Елеазар, што се крие зад ова ова?
-Елеазар е нов бренд, новото јас, нова енергија и нова креатива. Всушност, Елеазар е еврејско име и е правилната форма на името Лазар. Од Елеазар се изведени неколку имиња, меѓу кои и името на мојот син.
Целиот концепт е сведен на Ready-to-wear колекции и Custom-made дизајни. Колекциите ќе доживеат и своја онлајн продажба, каде што секој ќе може да купи парче од Елеазар. Нормално сите дизајни ќе можат да се видат, пробаат и купат и во моето ателје.
На сцената се враќаш на домашната сцена со колекција за пролет-лето 2019. Што содржи новата колекција и кому е наменета?
-Колекцијата пролет-лето 2019 од Елеазар е олицетворение на денешната жена. Знаеме дека живееме динамичен живот, постојано сме во брзање, излегуваме рано наутро, се враќаме доцна навечер и мораме постојано да изгледаме урбано, убаво, но сетоа тоа да биде и удобно. Токму таква е мојата најнова колекција. Ги споив креативата и удобноста. Природните материјали од кои е изработена колекцијата ја даваат удобноста на самите дизајни. Секое парче од новата колекција на Елеазар може да се комбинира и со патики и со високи потпетици. Самата колекција има фустани, панталони, комбинизонки, здолништа, блузи и мантили. Боите кои преовладуваат се црната и белата како неизбежно парче облека од ормарот на секоја жена, надополнети со пастелните пудресто розова, жолта, тиркизна и резеда. Сите дизајни ги спојува една нишка, акцент од црна тантела.
Дали новата колекција го следи стилот на твоите претходни, или Елеазар значи нешто сосема друго, нова естетика, нова модна приказна?
-Елезар е созреана форма, нешто поинакво, но со печат на Маја Кикириткова, што би значело созреана јас.
Каде може да се најде да се најдат твоите креации?
-Креациите ќе можат да се купат во моето ателје на улица Козара 26 и онлајн на мојот сајт www.majakikiritkova.com
Да, отвори и сопствено ателје…
Атељето се отвори со официјалното лансирање на новата колекција. За самата колекција подготвив и фотосесија, а дизајните на Елеазар можат да се видат и во ателјето. Концептот на самото ателје е мало интимно кретивно катче, каде постојано ќе творам, а секој што сака ќе може да го посети, пред сè да се напие топол чај или кафе, да поразговара со мене и да погледне што тоа се создава внатре.
Фото: Мартин Саровски/ Модел: Горјана (Моделс ин)/ Шминка: Зоран Шурбевски/ Чевли: Марвел
Нема коментари