Првото венче го направила за себе пред две години, без помисла дека ќе побуди интерес и дека други ќе посакаат да носат таков модел. Од аксесоар за првоаприлска маска, денеска дизајнерката на модни додатоци за на глава, Мартина Танаскоска, успеа да создаде препознатлив бренд. За кусо време круните, венчињата, лентите и шнолите La Martina Monroe, извезени со стил со цвеќе, кристали, панделки и бисери ги красат главите на стотици девојчиња, девојки и жени од повеќе генерации.
-Идејата за венчињата дојде сосема спонтано. Дома имав околу стотина вештачки ружи во темноцрвена – виолетова боја, кои требаа да имаат декоративна намена за нашата слава. Но, истите ги искористив како аксесоар за коса за мојата првоаприлска маска во 2013 година, каде што бев самовила. И така всушност „се роди“ првото цветно венче. А за оние со кристалите добив инспирација од ревијата Fall 2012 Ready-to-Wear на Dolce & Gabbana. И секако првото венче си го направив за себе, без помисла дека ќе сакаат и другите. Тука всушност се пласираше и тој вид на венчиња како мој производ- ја почнува Мартина својата приказна.
Танаскоска има изработено широк спектар на додатоци за коса. Рачно прави украси за шноли, ленти, стегачи, венчиња, круни, шешири, брошеви, појаси и доста интересно и свадбени букети од вештачко цвеќе. Инспирацијата и креативноста за истите ја црпи секојдневно од сѐ што ја опкружува.
-Социјалните мрежи се доста добар двигател на една моја инспиративна креација. А и секојдневните настани, случувања, луѓето ми се мотивација. Сега, брендот La Martina Monroe го препознаваат по цветните круни и Royal Evening венчињата со бисери и кристали. Убаво е чувството кога ме препознаваат моите клиентки, па ме претставуваат на нивното друштво со зборовите :„Е ова е Мартина, девојчето со венчињата“-вели таа.
Во моментов нејзината соба е претворена во цвеќарница од креативниот хаос и материјалите. Цветните круни ги изработува од метално венче и вештачко цвеќе и се трајни. Лентите за на коса можат да бидат од најразлични ткаенини, тантела, кадифе, ластик, украсени со цвеќе или пак пронижени со бисери и кристали . Венчињата од „Ројал“ колецијата се изработуваат на кадифе или памук, а на самиот материјал прави креации со бисери, кристали, циркони, метални ружички и друг вид на мониста. Експериментирањето ѝ е главна карактеристика. Така и настануваат новите производи „Ла Мартина Монро“.
Дел од нејзините венчиња ги споредуваат со тие на „Долче и Габана“. Мартина вели дека воопшто не ѝ пречат компарациите со врвните дизајнери.
-Секако секој црпи инспирација од некаде. Па и тие црпат од природата, од уличната мода и јас од нив. Ги пратам скоро сите ревии, пробувам да го следам моменталниот трендинг, но сепак сè што правам е моја креација и има мој печат. И да, ми годи споредбата со светски познатите и докажани дизајнери, не секој е достоен за таков комплимент-вели таа.
Украси со печат на La Martina Monroe носат од бебиња, стари само 30 дена, до жени во средна доба.
-Најчести клиентки ми се девојките на возраст помеѓу 22 – 35 години, меѓу нив и младите модерни мајки, кои имаат префинет вкус, сакаат да изгледаат елегантно и знаат што сакаат. Можам да потенцирам само дека не секој знае и може да ги носи. Па токму оттука доаѓа и некоја „природна селекција“. На сите им се допаѓаат, но не сите се смели да ги искомбинираат… Неодамна бев прашана, која јавна личност сакам да носи моја изработка. Одговорот беше Каролина. Нејзиниот стил на дива некако најмногу одговара на профилот на девојки кои ги носат моите изработки. Па ми се оствари таа желба, имав можност да изработам, подарок- шнола за неа.
Мартина, која е родена и живее во Скопје, е дипломирана новинарка. Но дизајнирањето додатоци за коса е нејзина главна преокупација.
- Работев како новинар, и додека студирав и после тоа, и некако тука не се пронајдов во таа професија, но никогаш не се знае. Сега сум цвеќарка и везилка. Колекционер сум на се што спаѓа под аксесоари. Од накит, часовници, ракавици, марами, капи, шешири, очила, до чанти. Има една интересна анегдота поврзана со мене. Неодамна ми беше роденден. Моја блиска особа, одбирала подарок по тој повод, каде што од страна на продавачката била прашана „што носи, што сака, каков тип на девојка е“. И одговорот на тоа прашање, можеби е едно од најдобрите објаснувања за мене – „ Сѐ“. Во текот на денот, можам да изгледам доста лежерно, хипстерски, раперски, па за вечерно излегување да дожиевам целосна трансформација или пак обратно, денски да носам шешир со пончо и нешто доста фенси, а вечерта да сум во маичка со апликација и кожни хеланки со чизмички. Доста трпам трансофрмации, како се чувствувам во моментот, така и изгледам. Во моментов, главна преокупација ми се поврзано со LMM (La Martina Monroe). Моето секојдневие е седење и везење. Доста време поминувам во изработување на нарачките. Можеби немам време за секојдневно дружење со другарките, но секако имам креативно – продуктивен ден-вели Мартина, која во моментов работи на еден поголем проект, но не сака да открива детали пред време.
Пред да се роди La Martina Monroe како бренд за венчиња, постоеше истоимениот блог за модни совети, секојдневни аутфит комбинации, совети и предлози за шминка и фризура, доста феминистички. Но истиот никогаш не го доживеа своето светло на публикација.
-Блогот сè уште постои, само што не го работам, но можеби наскоро ќе биде преориентиран како веб-страница за потребите на „Ла Мартина Монро“ аксесоарите…Во врска со модата, можам да кажам дека сум зависник од неа. Тоа ни е некако вдахнато на жените, а кај мене во семејството пособено. Сестра ми е моден уредник во списание. Покрај цвеќиња собата ни е „затрупана“ со модни списанија, каталози. Секојдневно сум инволвирана што е ново, како на модната сцена кај нас, така и во светски домен. Ја следам модата и што се случува, буквално „висам“ на онлајн сајтовите, претплатена сум да добивам и онлајн верзии на списанија, така да спаѓам во групата „зависници“ од мода-вели таа на крајот.
1 коментар