Сè започнало во 1991 година, во едно мало топло кројачко катче каде што се родила голема љубов кон дизајнирањето облека. Стремежот кон квалитет и посветеноста на работата набргу станале препознатливи, така што паралелено со зголемената побарувачка неколку години подоцна се отворил производствен погон со цел да се задоволат потребите на клиентите. Со неуморно создавање на креации за модерните и деловни жени, Bella, прерасна во еден од најреномираните македонски модни брендови. Еден месец по одбележување на 25-годишнината од самостојноста на Република Македонија, оваа компанија прослави исто толку години постоење. Јубилејот беше одбележан деновиве со ревија и коктел во просториите на „Ивент Центарот 21“ во друштво со своите клиенти, медиуми и соработници. По тој повод разговаравме со директорка на маркетинг и продажба на Bella, Стефаниа Златку.
Јубилејот беше одбележан деновиве со ревија и коктел во просториите на „Ивент Центарот 21“ во друштво со своите клиенти, медиуми и соработници.
>>Низ годините, како се менуваше тимот и капацитетите на Bella? Колку продажни места и вработени имате во моментов?
-Започнувајќи од нула, семејството на Bella денес брои над 50 вработени. Почнавме со еден, а моментално располагаме со три продажни салони – ГТЦ, Сити Мол и ТЦ БУЊАКОВЕЦ. Секојдневно работиме на тоа да овозможиме што поголем капацитет на производство со цел да можеме да ја задоволиме побарувачката на македонскиот пазар. Зад етикетите на парчињата на „Бела“ стои дизајнерскиот тим составен од Весна Ендровска и Ана Ендровска, без кои „Бела“ дефинитивно не би била тоа што е денес. Весна Ендровска е таа која ја започнува оваа приказна, а Ана веќе неколку години наназад е гласот на новата генерација. Заедно создаваат нераскинлив тим, а нивната неуморност, желба да ги надминат сопствените очекувања и љубовта кон тоа што го работат се сржта на компанијата.
>>Како би го дефинирале стилот на креациите на „Бела“, и на која таргет група се обраќате?
- „Бела“ е бренд посветен на модерната и деловна жена. Модната индустрија е динамичен феномен во кој актуелноста е еден од главните предизвици. Веруваме дека успехот на „Бела“ се должи на следењето на потребите на своите корисници и креирањето на облека која ги следи светските трендови, но истовремено поседува безвременска вредност. Комбинирајќи врвна мода со бескомпромисен квалитет, Бела создава креации во кои жената ќе се чуствува онака како заслужува – самоуверено, моќно, прекрасно.
Светлана Црнокрак е заштитно лице на колекцијата за есен-зима 2016
>>Може ли да ни кажете повеќе за новата колекција која ја претставивте деновиве со ревија и со промотивна фотосесија со Светлана Црнокрак?
-За престојната сезона преовладуваат необични миксови на топли бои со земјени нијанси. Колекцијата ја одбележуваат портокаловата боја на керамидата, црвената боја на розата, богатата виолетова со поднијанси на розева, земјената зелена, прашливата розева и дефинитивно црната боја чие враќање на сцената никогаш не било поактуелно. Додека во однос на кројот едноставноста и чистата линија го прават дизајнот навистина моќен. А внимателно одбраните материјали како што е природната рунска волна, кашмирот, свилата, всикозните штофови ја прават колекцијата ЕСЕН ЗИМА 2016-2017, колекција која секоја жена би посакала да ја поседува.
>>Во средата одбележивте четврт век во „Ивент Центарот 21“. Како се одвиваше настанот?
-Не би можела да бидам објективна во поглед на организацијата – тоа би можеле да го одговорат само гостите. Сепак, самиот факт што присуствуваа толку гости кои ни се драги за нас го прави овој настан навистина посебен и значаен.
Започнале од нула, но денеска семејството на Bella брои над 50 вработени
2 Коментари