Нежната, полетна и магична појава на сината „морфо“ пеперутка, која важи за една од најубавите креации на природата, многу често се јавува како инспирација во уметноста, науката, дизајнот, модата… Одушевена од нејзината совршената форма и впечатливa сина боја, 23-годишната апсолвентка на Архитектонскиот факултет во Скопје, Александра Атанасовска, решила да ја овековечи во своите први дизајни по завршување на курсот по филигран. Оваа инспирација прераснала во артистичко и стилско поистоветување со моќта на трансформација на оваа пеперутка, по која и го нарекла својот бренд за современ филигран MORPHO.
-Целата идеја и концепт на MORPHO започна пред точно една година. Набрзо по завршувањето на курсот почнав да размислувам за остварување на сопствен бренд кој ќе претставува одраз и експресија на мојата креативност. MORPHO претставува еден поинаков начин на себеизразување во чија основа е традиционалната филигранска изработка покажана во една нова димензија. Современото е во допир со традицијата, но во одреден момент се издигнува над неа. Клучната инспирација за името- Сината Морфо пеперутка, е препознатлива по нејзините нијанси на сино и металик, бои кои не се одраз на пигментација туку преставуваат оптички феномен. Оваа карактеристика овозможува произведените бои да се менуваат во допир со светлината и зависат од аголот на гледање. Токму првиот дизајн за прстен кој ме поттикна да се вљубам во филигранството беше инспириран од Blue Morpho пеперутката. Заедничкото својство помеѓу Morpho пеперутките и MORPHO филигранот е уникатноста и специфичноста на секоја пеперутка, односно секое парче накит-вели Александра.
Зад брендот стои 23-годишната архитектка Александра Атанасовска
Потрагата по креативни начини на изразување кај нејзе се појавува уште во раните години. Почнувајќи со цртежи, графика, продолжувајќи со бои и сликарство, студиите на Архитектонскиот факултет, и тука некаде се појавува новата нишка, дизајнирање накит, каде финален производ е мало, уникатно, магично парче уметност. Курсот за филигран го посетувала пролетта 2016 година, и по неговото завршување продолжи самостојно да работи.
- Дизајнирањето накит е одраз на мојата љубов кон уметноста. Самиот процес на преточување на една идеја во готов производ е предизвик, а како дополнител мотив претставува задоволството на личностите за кои тоа парче накит е наменето. Најчесто изработувам обетки, ланчиња и брошеви, но сепак најголем предизвик ми претставува пронаоѓањето на нови форми и необични облици на прстени. Ги користам техниките на традиционалниот македонски филигран вметнувајќи современ дизајн. Среброто како материјал овозможува експериментирање со најразлични облици, без ограничување. Дизајнерскиот процес започнува во моментот на лична инспирација, каде изразот на една идеја во цртеж постепено прераснува во уникатно уметничко дело-вели таа.
MORPHO накитот е инспиран од природата и формите кои можат да се прочитаат од неа. Секое парче носи своја приказна и е изработено со многу љубов и внимание. За Александра дизајнирањето накит претставува израз на креативност и страст каде секој дизајн пренесува различна енергија и покажува различна емоција.
- Мојот накит најчести го избираат девојки и жени на возраст над 20 години. Особено ме радува фактот што се повеќе млади девојки се заинтересирани за филигрански накит, што всушност ја претставува главната цел на MORPHO. Преку нови и невообичаени дизајни да се задржи и да се негува традиционалниот занает-вели таа.
Годинава накиот го престави на неколку модни и уметнички настани како : второто издание на Fashion and Lifestyle Expo во МОБ, на пролетното издание на Моден викенд-Скопје во салонот на Porsche Macedonia. Со новата Spring колекција се претставина Paratissima во просториите на Младинскиот културен центар.
- Во моментов со целата енергија сум посветена на дизајните за новата колекција која е во план да биде презентирана на првиот роденден на MORPHO, следниот месец на 14ти октомври. Ќе биде организирана мала коктел забава каде секој ќе може да ја погледне новата изложена колекција. Повеќе информации ќе бидат презентирани на Facebook страната штом организацијата стигне до своите финални фази. Во иднина се надевам дека MORPHO ќе се развие во квалитетен бренд кој ќе продолжи да ја негува македонската филигранската традиција и ќе ја промовира и пошироко од нашата земја-вели таа на крајот.
Поглед кон агол од работилницата на Александра
Сината „морфо“ пеперутка е инспирација за дизајните и името на брендот
*Не е дозволено пренесување на содржината на www.stylist.mk без одобрение на уредништвото. При објавување на материјали од модниот сајт www.stylist.mk, во други медиуми задолжително наведете го изворот од кој е преземен текстот и поставете хиперлинк. Цитирањето и објавувањето на линкот е задолжително, во спротивност ќе подлежите на правни мерки.
Нема коментари