„Омајгад“ со принтови на кирилица му искажува љубов на Скопје

„Кул си као јас“, „Знаеш дека ти се свиѓам“, „Ќип калм и грми си“, „Мустаќи се кул, ама не ми стојат“, „Живеј го секој ден ко да е петок“, „Брат за брат, све за другари“, „Јас и ти се сакаме, ајде да се лапаме“… Ова се дел од симпатичните пораки што сè почесто ги гледаме испечатени со кириличен фонт на маички и на постери во Скопје. Многумина се откажуваат кога треба да направат принт за блуза на кирилица и се одлучуваат за латиничен текст. Но, за 25-годишниот Гоце Велески тоа е инспирација. Овој графички дизајнер, под својот бренд „Омајгад“, повеќе од половина година шара маички по кратки ракави со интересни транскрипции од англиски јазик или слогани со скопски сленг.
-Буква си е буква. Дали била W или Њ, секоја си нуди уникатен начин на доразвивање. Да, кирилицата ми е инспирација, ама пред сè предизвик. Знаете, не е работата да се качиш на истото брдо како и другите, туку да се искачиш на тоа од другата страна на кое се нема качено никој досега, а кирилицата како наша примарна и единствена азбука е страшно кул ствар за доработка и превртување -вели Гоце, кој објаснува дека „Омајгад“! е колектив кој ја создава „Кирилицата што се носи”.

Гоце Велески е основач и креативен ум на „Омајгад“

Брендот настанал на 1 август минатата година, попрецизно во 01.15 часот.
Идејата за „Омајгад“ првично се појавила на лист хартија додека Гоце средувал некои фајлови пред да отиде на одмор.
-Од шкртаница на лист, прерасна во репетиција на пишување на лист за да во 02.00 веќе го направам фан- пејџот и почнав да размислувам на темата што понатаму. Одморот ми дојде супер за да го развијам проектот „натенане”, па на 13 септември 2013 година ја направив и промоцијата…Маиците се примарен продукт на „Омајгад“. Маица е закон ствар, се носи 365 дена и стои на сè (како тегет чорапа). Постерите кои ги извадивме не се покажаа нај нај, па затоа решивме да се вратиме на текстилот и продолжуваме со маици, па живи здрави кога ќе залади ќе правиме и дуксери-вели тој.

На 15 март (сабота) во локалот „Концепт 37“ со почеток во 20 часот ќе ја промовира новата колекција, наречена „Омајгад за Скопје, со љубов”. За презентација на настанот Гоце изработи и видео, кое е своевидно патување со автобус низ скопските улици, а во позадина оди музика на „Град на страв“ од „Токсиколози“, придружувано од диџеј Чваре.
-За оваа колекција се решив да направам тотално шаренило, значи маички во разни бои и двобојни дизајни. Првата колекција беше монохроматска, па одличив втората да ја живнам, плус, пролет доаѓа, мораше малку и ние да расцветиме „Омајгад“ и не го сфаќам како моден бренд, туку повеќе како урбан тренд…. Оваа колекција, исто како и првата ќе биде лимитед едишн, а содржи вкупно четири дизајни, аплицирани врз маички од 100 отсто памук.
Со првата колекција „Омајгад“ се етаблира како бренд со кул слогани кои на сите им се допаѓаат, и кои се испишани на македонски јазик. Овој пат колекцијата е донесена на едно емотивно ниво т.е. како што кажува и името, акцентот е ставен на Скопје.
Во линијата има и нацрти од познатиот дизајнер и илустратор Иван Петрушевски- Флим.
-Со Флим(тастик) се знаеме од моите почетоци како дизајнер, работевме во иста агенција и така почнавме да се дружиме. Соработката беше едноставна, на „скајп“ му пишав „Брат, ај напрај дизајн за дизајнов” и така.  Флим е супер дечко, генијален илустратор и честа е огромна што придонесе со супер кул илустрација.

Најчести клиенти на „Омајгад“ се, како што вели Гоце: урбани ликови, луѓе со стил и оупен мајндет. Нарачката на маиците се врши преку фан-страната на „Омајгад“. Етикетата беше дел од хуманитарната изложба „Дизајнирани прегратки“.
-„Дизајнирани прегратки” е една убава акција која ја организираше Ирина Тошева, а сум повеќе од расположен да учествувам на сите хуманитарни настани со моите дела, пред сè заради самиот чин на хуманост, едноставно се будиш следното утро со мисла дека на некаков начин си помогнал, а воедно е убав начин а промоција на релативно млад бренд како „Омајгад“….Инаку со јавни личности досега немам соработувано, освен ако се брои аминот кој го добив од „Чиста околина“ да ги искористам за еден дизајн во новата колекција. Но во секој случај, според тоа кој се има купено маичка гледам дека јавните личности од нашава земја го сакаат брендот „Омајгад“, некои од нив и со гордост си ги носат маичките.  Првата промоција на „Омајгад“ беше самостојна, а исто така и следната е самостојна. За изложби на графички дела имав размислувано порано, но сега истите се префрлени на „Омајгад“, зашто тој тип на промоција ќе трае и кога ќе се потрошат маичките од колекциите затоа што нели, маица е и се носи дур не се скине-вели тој
При првата помисла дека Омајгад ќе биде бренд аплициран на текстил, без размислување за маички го одбрал брендот Fruit of the loom.
-Тие се со 100 осто памук, убав крој на маички што не „гушат” во пределот на вратот, а бонус на сето тоа и се официјалните маици на кои се печати I (L) NY. Дизајните се аплицираат со сито печат, поради уникатноста која ја носи ситото само по себе, и плус издржливоста на печатот е безвременски. Башка, стара школа си е стара школа-вели тој.

Гоце работи како графички дизајнер од нецели 20 години. Првиот ангажман му бил во Pointer Creative Agency, каде што сериозно почнал да работи на дизајни.
-Примарен клиент на кој што работев беше клубот „Колосеум“, па постерите и маиците ми станаа секојдневие и некако така си се сврте работата натака. Завршив курс за дизајн во „Александрија“, а сега студирам дизајн на ФОН (мајка ми многу сака да има дома диплома од факултет закачена ), a моментално работам во Inovativa Group, мала слатка и супер кул маркетинг агенција-вели тој и додава дека приватно е „среќно заљубен, обожава добра журка, драмендбејс, гејминг, сноубординг и легачење по дома. Се буди и заспива со дизајн, а понекогаш не ни заспива“.
Тој е основач, дизајнер, дистрибутер, сошл медиа менаџер во „Омајгад“.
- Тимот на „Омајгад“ е огромен, а кога кажувам огромен тоа значи дека има премногу луѓе кои сериозно ја поддржуваат работата на брендот. Тука е мојата девојка, која ме трпи кога заглавувам со работа, која ме разбира кога ќе ги истрошам парите на маички и немам за излегување, а нафрла и супер креативни идеи, помага, а понекогаш и скицира во пеинт. Исто така преголема поддршка имам и од Inovativa Group, агенцијата во која работам на чело со Сања Николиќ, каде покрај сите останати обврски не се пропушта можност да се направи ред два пет муабет за „Омајгад“.

Објаснува дека за него и за „Омајгад“ 2014 почна многу ЈАКО.
-Првата колекција е готова, работи на колаборација со еден кул дечко од Белград (Nerdie Bird-Jebetesehipstere) која би требало да се појави летово, а останатите планови искрено се на база на фристајл, па ако нешто дојде како идеја се прави…Така настана и „Омајгад“.