Удобност, минимализам и младешки дух, со кои се дефинира модниот пристап на дизајнерката Ирина Тошева, се дел и од новата колекција за есен-зима 2014/15. Новата линија, поддржана од My:time, ќе ја претстави 25 октомври во салонот „Ауди-Порше Македонија“, со почеток во 21 часот, во рамки на десеттото издание на Моден викенд-Скопје.
-Колекцијата претставува пренос на сликите на природата во секојдневното урбано сивило. Зебрата е главната инспирација, како симбол на индивидуалност и ни открива дека колекцијата е наменета за оние кои се во постојано движење и имаат желба да се разликуваат од околината. Токму тие умеат да ги слушнат своите инстинкти и да изгледаат онака како што се доживуваат одвнатре. Насловот сè уште не го откривам…По шаренилото од минатата сезона овој пат се „ограничив“ на неколку бои: сива, темносина, зелена и розова . Акцентите се бели. Строгиот крој и потешките ткаенини се водечките елементи во новата колекција-вели Тошева.
Креациите повторно се наменети за младите и оние што така се чувствуваат. Комбинациите се соодветни за дневни и вечерни излегувања.
По шаренилото од минатата сезона овој пат Тошева се „ограничила“ на неколку тонови: сива, темносина, зелена и розова Фото: Младин Паповиќ, Модел: Ана Ежова
Ирина е една од ретките што редовно создава креации за двата пола. И во новата колекција, покрај моделите за жените/девојките, има дизајни и за мажите
-Машките модели се минималистички строги кроеви, но има и игра на принтови. Тоа се креации за поединци кои не се плашат да излезат од „сигурната зона“ и бидат забележани-објаснува таа.
Често нејзините колекции се придружени со модни додатоци. Овој пат ќе има неколку парчиња торби и брошеви како надополнување на приказната, но овој пат пресудни ќе бидат модните додатоци од спонзорот на креаторката, My:time.
Тошева планира и на оваа ревија амбиентот да биде надополнет со македонска музика. Вели дека нумерата што ќе оди на ревијата одлично се спојува со креативниот пулс на колекцијата. Кореографијата нема да отскокнува од вообичаеното, сакајќи дизајнот да биде ставен во центарот на вниманието.
Новите креации се удобнит, минималистички и со младешки дух Фото: Младин Паповиќ, Модел: Ана Ежова
Ова е шесто учество на Ирина на Модниот викенд-Скопје.
-Модниот викенд во моментов претставува единствена организирана платформа за презентација и развој на модата кај нас. Исклучително важен настан што го сопре молкот кој претходно некое време го имаше и повторно ја постави модата како прашање што се третира на поредовна основа во медиумите. Организацијата е на високо ниво и ме радува што се започнуваат соработки и со другите модни настани во регионот.
Пред Модниот викенд-Скопје колекцијата ќе биде прикажана на Serbia Fashion Week во Нови Сад. По ревиските претставувања, на крајот на месецов, ќе биде достапна во нејзиното ателје, во Lotus Design Store во „Скопје сити мол“, како и на онлајн низ целиот свет преку bastetnoir.com. Одбрани парчиња ќе може да се најдат и во Just Because Concept Store како и концептуалната продавница al.to во Љубљана.
Креации на Ирина претставени на Месецот на дизајн во Љубљана
Ирина деновиве престојуваше во Љубљана, како дел од македонскиот тим што се претставува на тамошната манифестација Месецот на дизајн. Во соработка со архитектката Александра Шекутковска и нејзниот колектив The URB CLV создаде уникатни чанти, а во изложбениот дел беа претставени и нејзини препознатливи креации.
-Ми претставува посебна чест што Александра ми се обрати токму мене како прв дизајнер кој ќе соработува со The URB CLV. Беше предизвик да се изработат чанти кои истовремено ќе го имаат мојот дизајн, но и визијата на нејзиниот бренд. Ме радува што интересот е огромен. Спојот на креативци секогаш вродува со плод. Чантите со мали промени ќе бидат дел и од новата колекција.
Организацијата на настанот овозможи навистина да се остварат соработки и да се разменат искуствата. Особено драго ми беше што имав прилика да ја презентирам мојата работа пред професионалци како Бранко Поповиќ. Секако, значајни беа и директните контакти наменети за бизнис соработка со што веќе од оваа недела мои парчиња ќе бидат достапни и на тој пазар.
На Skopje Design Week одржа модна работилница
Пред неколку месеци, пак, се претстави на Balkan Emotion Fashion Days во Виена.
- Идејата и иницијативата на Balkan Emotion Fashion Days се за поздравување и се надевам дека во иднина ќе прерасне во сè подобар и поголем настан. Настанот беше одлична можност да се покаже дека и македонскиот дизајн е извозен производ. Овие прилики се навистина драгоцени, бидејќи секој дизајнер има потреба да излезе од границите на својата комотност и да размени идеи со други колеги.
На неодамна одржаниот Skopje Design Week во соработка со брендот Lotus Design Store одржа модна работилница, наменета за секој вљубеник во модата и лесната и брза реализација на креативните идеи.
-Ме радува што гледам дека производите кои успеавме да ги создадеме девојките учеснички гордо ги носат по нашите улици. Имав комплетно практичен приод. Учесниците изработуваа облека што се создава од кроење во круг. Секогаш сум среќна кога можам директно да комуницирам со личности на кои модата им е пасија-вели таа.
По бурниот октомври ќе почне да ја подготвувам капсулната колекција во соработка со Нина Симовска, која ќе биде презентирана при крајот на годинава.
Нема коментари