Женственост, елеганција, минимализам и урбаност ја сочинуваат сложувалката на колекцијата Complete Your Puzzle за пролет-лето 2015 која етаблираната креаторка Олгица Ѓоргиева ја презентира вчеравечер во рамките на Моден викенд-Скопје. Публиката во „Ауди-Порше Македонија“ можеше да погледне линија која истовремено е нежна и силна, составена од секојдневни трендовски парчиња, како долги широки панталони, блузи со отворен грб и бизнис-костими, но и елегантни фустани во стилот на 50-тите. Застапени се белата, црната и жолтата боја, и има доста принтови. Од материјали, користела вискоза, памук и стилизиран жоржет.
- Сите парчиња се носливи, со претежно чисти линии, минималистички израз надополнет со детали или накитот од Oxxete, кој се мои поддржувачи и со кој веќе имаме долгогодишна соработка. Во принцип секогаш ги следам трендовите, но никогаш слепо не се врзувам за нив. Она по кое се водев главно беше идејата. Таа е претставена на суптилен и стилизиран начин, не премногу нападно, дискретно и умерено. Размислував за колекција која во исто време е модерна, елегантна, нослива и уникатна. Сепак станува збор за применливи парчиња и е наменета за девојки/жени кои сакаат -ни изјави Ѓоргиева.
>>Идејата за колекцијата се развила за време на твојот неодамнешен орестој во Париз. Какви искуства стекна таму, колку на професионален план те промени и научи нешто ова патување?
-Моето патување повеќе беше приватно, меѓутоа земајќи во предвид дека отидов точно во период кога се одржуваше Модната недела во Париз, го искористив делумно и работно. Успеав да посетам неколку ревии, учествував на работилници и се запознав со дел од посетителите и излагачите лично. Ја погледнав ревијата на „Кензо“ , настаните на Галијано, како и модните спектакли кои се случуваа на улиците од Париз…Нештата што успеав да ги видам се од огромно значење за мене, пред сè во однос на прашањата, што, како, каде, до каде и слично. Колекцијата настана токму таму, во Париз. Идејата се разви многу спонатно, а инспирацијата дојде додека гледав една проекција на катедрала која беше маркантна.
>> По една сезона пауза, повторно се врати на Моден викенд. Ти си дел од Моден викенд уште од првото издание. Паралелно растеа твојата кариера и оваа манифестација…. Од какво значење е за тебе оваа манифестација?
- Токму така, ние со Модниот викенд некако заедно растеме. Во периодот кога јас влегов во овој проект бев на почетокот од мојата кариера и некако паралелно се развиваме. Нормално дека е од голем значење овој настан за мене. Публиката која е дел од цела оваа манифестација , а и останатите вљубеници во модата, преку вас на друг начин можеа да ја следат низ годините мојата работа и да го пратат моето растење како дизајнер. Земајќи во предвид дека ние скоро и да немаме некои поголеми настани од моден карактер, Модниот викенд е одлична можност за градење на работите во модата кај нас. Со тек на време, со заедничко работење мислам дека може да се направи добар производ, кој би можел добро да продава.
>> Летово победи во конкуренцијата за најдобар дизајнер за регионот на Европа и Русија на Интернационалните бугарски модни награди EIRENE 2014. Успеа да се пласираш во финалето, меѓу 10-те најдобри, на престижниот избор. Од какво значење е за тебе овој успех, како се рефлектира на твојата кариера?
- Овој настан е добар за моето портфолио. Секако дека ми значи. Што ќе се случува ќе видиме допрва. Активностите се планирани за 2015 година.
>> Минатата зима лансира колекција наменета за деловни жени. Тоа се и твоите најчести клиентики. Каков е фитбекот од таа линија?
- Тоа беше одличен проект, кој имаше добар концепт и кој сакаме да го надградиме и продолжиме и во наредните сезони. Подготвуваме нови работи, кои полека ќе ги пуштаме во јавност по Модниот викенд. Ќе има доста нови парчиња и мислам дека клиентите ќе можат да бидат задоволни со тоа што ќе им го понудиме.
>>Дури и кога правиш пауза од нови колекции, не мируваш. Изминатата пролет-лето лансира линија со маици со принт. Какви се реакциите за маиците, колку и кои најмногу се бараат?
- Паузата ми беше потребна, но јас не престанав да работам , во позадина бев доста активна, претежно работа со клиенти. Маиците одлично поминаа, а посебно ме радува дека најбарана маица беше ПОНЕДЕЛНИК, чиј слоган беше GOrgeus.
>>Какви ти се плановите за до крај на 2014?
- Да се завршат започнатите работи, да се затвори еден круг и здравје од јануари 2015 продолжуваме да работиме со еден нов, малку поинаков концепт за кој дополнително ќе ве известам.
Фото: Ани и Дими
Нема коментари