Со години се прашуваме како текстилната индустрија во Македонија да ја претвориме во модна индустрија, односно како ЛОН системот да го замениме со сопствен дизајн и бренд и дали имаме доволно квалифукивани кадри, модни дизајнери кои можат да придонесат во сето тоа. Токму на оваа тема разговараме со Симон Ендровски, оперативен менаџер на модниот бренд „БЕЛА“ кој успешно го освојува пазарот повеќе од 25 години.
Симон Ендровски
Додека во Македонија со години стои прашањето како лон-производството во текстилната индустрија да се замени со готови производи под сопствен бренд, вие изградите една поинаква приказна и успешно опстојувате на пазарот повеќе од 25 години. Која е тајната на „Bella“?
-Не можам да кажам дека има само една тајна компонента, напротив сметам дека успехот на компанијата доаѓа од способноста на тимот да ги реализира идеите кои одапред сме ги зацртале т.е. во нашиот случај нацртале.
Економските принципи ги прават индустриите динамични, а ние сме во една од најстарите индустрии и поради заситеноста истата е и една од подинамничните. Од тука произлегува потребата за трансформации на процесите како додавање, подобрување, усовршување и отстранување на непотребните процеси. Во изминатите 10 години активно учествувам во овие промени и тие се најголемиот предизвик во мојата работа.
Дали има доволно квалификувана работна сила во Македонија за оваа индустрија и како доаѓате до нив?
-Без сомнение сите индустрии во државата имаат недостаток на квалификувана, а и на неквалификувана работна сила. Текстилната како втора индустија по број на работни места уште пред повеќе од 5 години се соочува со овој проблем. Главна алатка за прибирање на нови кадри треба да бидат образовните институции, а ние од неодамна започнавме соработка со Академијата за Моден Дизајн на Сеавус Едукативниот и Развоен Центар.
Како започна Вашата соработка со Сеавус Едукативниот и Развоен Центар (SEDC)? Дали досега сте соработувате и со други образовни институции со цел регрутирање на потенцијални кадри за работа?
-Секако дека сме соработувале и со други образовни иституции, како за високо квалификувана сила така и за средна квалификувана сила. Но за разлика од останатите, SEDC во програмата обучува кадри кои имаат познавања и од моделирање со што се разликуваат од останатите школи за моден дизајн, а поради взаемниот интерес за практичната примена на стекнатото знаење на студентите стапивме во контакт и остваривме соработка.
Натали Наумова
Гордост на менторите е кога ќе видат дека нивните студенти се задоволни од тоа што го научиле на Академијата и имаат можност практично да го применат истото. Особенo задоволство е кога нивниот труд на крај ќе се заврши успешно и ќе добие една целина. Таков е случајот кај вас, каде студентот успешно ја реализираше праксата и се стекна со работен статус во вашата компанија. Што ја очекува сега вашата нова колешка?
-Апсолутно истото важи и за нас, среќни сме кога ќе успееме да вработиме практикант, бидејќи со истото покажуваме дека времето било ефикасно искористено. Во однос на очекувањата, по завршување на праксата следува уште еден долг период на обука (околу една година), а по стекнувањето на одредено работно искуство ние можеме да ја оцениме стручноста на вработениот. Во „БЕЛА“ годишно произведуваме над 200 уникатни производи и секој од нив е проект сам за себе, кој треба да се развие од хартија до финален производ. Очекувањата се предизвикувачки и за новата колешка Натали и за сите нас како тим.
Како бренд бр.1 кога станува збор за дизајнирани парчиња облека за модерна и деловна жена, што во иднина може да очекуваме од „БЕЛА“?
-Во брзо време очекувајте нови колекции кои ќе бидат уште подобри и во дизајнот и во функционалноста. Во иднина, планот е да се прошириме на надворешни пазари и таму да го достигнеме упехот кој го имаме во Македонија. Напорно работиме на реализација на нашата цел и се надеваме на успех!
Нема коментари