Изложба на MightyJewelry: Минијатурни пејзажи од природата врамени во смола

Минијатурни пејзажи, инспирирани или позајмени од природата, врамени во епоксидната смола ќе може да се погледнат на новата изложба на дизајнерот на накит Александар Пешевски, што ќе се одржи од 7 до 14 ноември во „Концепт 37“. Креативецот, кој работи под називот MightyJewelry, ќе ги претстави своите најнови 50-70 ѓердани создадени од дрво, камен, смола и друго, магично споени во една приказна.

-Ќе понудам поразлични дизајни и форми кои сами се создаваат низ работата. Последните се слободни форми и минијатурни пејзажи од природата. Тоа беше и почетната идеја, со комбинирање на техники да постигнам минијатури. Низ континуирана работа се менува и техниката која ме донесе до нови вертикални фирми. Од дрво има орев, бука, круша, афрички орев. Други материјали се ситни камчиња, песок и сè друго од природата-вели Александар.

Тој беше еден од учесниците на неодамна одржаниот саем „Накит 2016“ во „Јавна соба“, каде што понуди дел од новите креации.

-Саемите се битни за секој автор да се промовира и да се запознае со останатите излагачи. Тука се разменуваат идеи, се создаваат нови, се добиваат насоки за нови техники, критики и пофалби. Преку посетеноста исто се остваруваат контакти и се прати интересот на посетителите. Дружењето е најпозитивната страна на самите и базарите-вели тој.

Неговиот накит може да се најде и во новоотворената концептуална продавница Wonderlust. -Wonderlust e убаво место, склопено од креации на дизајнери кои се постојано промовирани. Интересот за овој тип на накит е позитивен, секако е потребно време да го научат и навикнат на око а понатаму и како дел на себе-додава тој.

Приказната на MightyJewelry се родила од љубовта за работа со дрво.

-Сè е настанато од љубовта за работа со дрво. Сите моменти кои се случуваа се поврзуваа во создавање на накит, јас само го пратев сето тоа. Идејата за MightyJewelry е од MightyCreation- името под кое веќе повеќе од 15 години работам како графички и веб-дизајнер. Приказната почна кога избрав да работам графички дизајн. Со тек на време самата креативност почна да се шири на различни полиња и така се појави MightyPosters, MightyGourds (дизајн на лејки кој го работев пред накитот) и сега MightyJewelry. Сите овие работи се меѓусебно поврзани, функционираат паралелно и се надополнуваат меѓусебно. Накитот е само продолжување на нешто кое го прекинав пред повеќе од 10 години за да се посветам професионално на дигиталната креативност-вели Пешевски.