Минатата година на 28 октомври официјално започна со работа „Јавна соба“ (Public Room). Веќе една година од постоењето на овој јавен простор во рок од 365 дена се реализираа 311 настани од најразличен формат: јавни дебати, прес конференции, кулинарски работилници и тематски вечери со кувари од цела Европа, фестивали, филмски проекции, базари, продажни и туристички саеми, музички настани, семинари, обуки, работилници и изложби, прослави, team building… Сето ова кажува зошто за огромен број на странски и домашни посетители Јавна соба е прв избор.
Како награда за публиката на 28 октомври се организира целовечерен настап на ДЈ Марко Настиќ, и влезот за сите посетители е слободен.
Сведоци сме дека голем број на млади професионалци, амбасадори, деловни лица, естрадни ѕвезди, уметници ја прифатија „Јавна соба“ како свое место за состанок, деловен ручек, некои од нив го доживуваат просторот како втор дом или како катче во кое може да се работи преку целиот ден. Компании, амбасади и организации ја увидоа предноста на работење во еден неформален, неоптеретен хибриден простор, па честопати организираат team building активности, обуки, предавања, или чисто доаѓаат на дружење, колективен ручек, вечера и слично.
Вработените веќе и не помнат колку сè настани се органзирани и кој е највпечатливиот за нив. Програмскиот директор Тамара Георгиевска како најавтентични ги издвои: комшискиот фестивал „Приштина во Скопје“, фестивал кој направи спојување на два града, два различни народи кои совршено се надополнуваат со своите идеи, работа и иницијативи, потоа, „Индонезиска кујна” со Пол Хотхаузен, изложбата „Имагинарен град” на Александар Наумчески како дел од Биеналето на Архитектура, цуклусот детски работилници „Звучна вселена” на Јулија Ѓорѓевиќ музичките концерти на „Фирс” и „Секстат “, газењето на грозје на саемот за промоција на мали бизниси од Вардарски регион и промоцијата на новиот бренд Bare origin на органска козметика од Нена Стојова.
Неделата на дизајн во Скопје која годинава ќе се одржи од 23 До 27 ноември, конечно доби свој дом, ова е простор во кој дизајнот се развива и се промовира на голема врата во земјава, но и надвор од неа. Изминатата година на престој по 30 дена беа 9 дизајнери од цела Европа кои оставија свој печат во „Јавна соба“. Оваа година на фестивалот Недела на дизајн во Скопје, благодарение на постоењето на „Јавна соба“, ќе бидат претставени повеќе млади брендови кои настанаа во изминатата година.
Веќе се поголем број на туристички водичи и индивидуалци ги носат странските посетители во „Јавна соба“. После традиционалната прошетка на Кале, Матка и Водно странците се носат во „Јавна соба“ за да ја видат и современата димензија на Скопје. Водичите и домаќините со гордост зборуваат за Јавна соба, како градски топоним и место во кое се инкубираат урбаната култура и навики.
Јавна соба е простор кој нуди неформално образование, простор кој храбро се бори против сите општествени стереотипи, нуди прогресивна кујна и музичка програма, амбиент кој инспирира, оживува, стимулира инспирација и поттикнува општествен развој. Ова е прв модел на функционирање на социјално претприемништво во вистинска смисла на зборот.
Следната година фокусот се става на соработката со деловниот сектор и развој на кулинарството во земјава. Проектот “Вкусот на Скопје” вклучува готвачи од светски калибар и е прифатен одлично од страна на публиката. Програмата во 2017 година ќе промовира нови брендови, кулинарски работилници, детски работилници, модно катче, и застапеност на повеќе македонски производи. Секој поединец, организација или компанија кои имаат идеја за било каков креативен настан: обука, изложба, сценски настап, музичка точка, базар, саем или работилница и сл, можат да проверат зошто сите проегресивни лица во градот ја преферираат „Јавна соба“.
Нема коментари