Покрај костимот за капење, задолжително парче од гардеробата на летување е облеката што ја носите врз нив. Избор бр.1 скоро секогаш е кафтанот, лесен, лелеав, угоден за носење, некогаш транспарентен, препорачливо од природна ткаенина и трендовски за секое летување иако датира стотици години наназад. Како облека се среќава уште во Месопотамија, кафтанот е вообичаен во иконографијата на Северна Африка и Азија, а во популарната мода се појави во 60-тите и 70-тите години од минатиот век како дел од хипи-бохо стилот. Кафтаните како што денес ги познаваме доживеале повеќе модификации, со различни должини и ракави, од свила или памук, еднобојни или со разни екпресиввни шари, украсени со циркони или мониста. Во лето, не само што е идеален за на плажа, туку и за летни забави во некој beach club, или вечерно излегување. Сезонава го сретнавме како понуда кај повеќе high-street брендови, како„Зара“ и H&M, но и кај полуксузните модни куќи како „Мисони“, „Етро“ и „Пучи“.
Нема коментари