Супермоделката Клаудија Шифер, една од најпознатите манекенки кон крајот на 80-тите и низ 90-тите години, вчера наполни 45 години. Приказната вели дека е откриена на 17-годишна возраст, во дискотека во Дизелдорф, и тоа од страна на Мишел Леватон, газдата на модната агенција „Метрополитен“. Потекнува од богато германско семејство на адвокати, па сè до откривањето и активирањето во модниот свет, Клаудија планираше кариера на адвокат. Со манекенство почна да се занимава дури откако матурира, и како и сите девојки што сакаат да станат познати во оваа професија, се упати кон Париз. По пробните снимања, за кратко време беше забележана и се појави на насловната страница на француски Elle. Во почетокот на 90-тите ја доби кампањата на брендот Guess, по што стана позната, а набргу го привлече вниманието на Карл Лагерфелд и во следните години е муза на дизајнерот и заштитно лице на „Шанел“. Деведесеттите беа во знакот на Клаудија и уште неколку супермодели. Со безброј насловни страници, модни писти, вносни рекламни кампањи за луксузни брендови, Клаудија стана едно од најпрепознатливите лица во светот. Денес живее во Лондон, со сопругот Метју Вон и трите деца, повремено дизајнира и се појавува во рекламни кампањи и фотосесии. Во чест на нејзиниот роденден, да се потсетиме на неколку моменти од нејзината рана кариера и од перодот на најголема слава.
Нема коментари