Приказната и идеите на филм „Соништа“ (Yume) на култниот режисер Акира Куросава подолго време создавале кретивен немир кај дизајнерот Драган Христов, што прераснал во инспирација за нова колекција под брендот „Лудус“. Посебен моден предизвик за него се соновите што се повторуваат, кои ги раскажува со линијата за пролет-лето 2014. Таа е наречена Yume, што на јапонски значи соништа.
-Филмот е мој предмет на обработка повеќе години, а интересот за толкувањето на соништата е нешто што кај мене започна со создавањето на колекцијата. Соновите што се повторуваат (reccuring dreams) ми станаа особено интересни за визуелизација. Јазикот на потсвеста е сличен со модниот, по пат на симболи можно е да се создаде цел свет. На лично ниво, сликите од оваа колекција ги обработуваат моите лични чести соништа. Па така сликите раскажуваат за косата, забите, голотијата, срамот итн. Симболи што се чести во сечии сонови-вели Христов.
Фотографиите ги сними Жарко Чулиќ, а како модел се јавува Ана Калачоска
За оваа колекција за првпат соработува со Билјана Каровска, ликовен уметник кој се занимава со рачно сликање на свила и слични материјали. Во колекцијата веднаш се забележуваат налсиканите воилетово – портокалови мотиви што даваат поинаков печат на парчињата. Ги прават препознатливи и неповторливи. Производството во мали серии и неможноста да се повтори парчето облека дава посебна вредност на оваа колекција. Следствено на трендовите, застапени e виолетовиот жакард со светкава структура – виолетов жакард, трендовската пудра боја и секако белиот транспарентен свилен жоржет.
Моделите се надополнети со рачно сликани елементи од уметницата Билјана Каровска
- Како и останатите производи на „Лудус“, оваа колекција е наменета за жена со креативна професија и комплексен и фасцинантен карактер која има потреба сето тоа да го соопшти преку надворешниот изглед. За прв пат дел од колекцијата ќе биде прикажана во галеријата во МКЦ за време на Super Design Pop-Up Store. Веднаш потоа ќе се доработи и ќе се продава во концептуалната продавница Just Because во Скопје. Клиентите инаку можат да ja следат нашата „Фејсбук“ страна за да бидат информирани навреме за сите наши новости- вели тој.
Стајлингот го направи блогерката Мартина Неделковска
Неодамна направи промотивен lookbook за колекцијата со манекенката Ана Калачоска и со фотографот на Жарко Чулиќ.
-Работата на каталогот е секогаш мое особено задоволство. Беше фантастично да се работи повторно со Ана Калачоска, уште повеќе затоа што бев фиксиран моделот да има портокалова коса. Студиото „Панаш“ заврши одлична работа со нејзината боја на коса, како и со шминиката. Покрај фотографот Жарко Чулиќ имав одлична соработка и со блогерката Мартина Неделковска, која го направи стајлингот.
На 9 и 10 мај во галеријата во Младинскиот културен центар – Скопје, Драган организира дводневна поп-ап продавница Super Design Pop-Up Store. На настанот кој ќе трае од 12 до 22 часот ќе учествуваат повеќе домашни дизајнери и брендови.
-Покрај лукбукот за новата колекција, периодов го организирам засега најголемиот поп ап стор во галеријата при МКЦ, Скопје. Проектот им нуди на македонските дизајнери продажба на сопствените колекции, како и соодветн промоција. Овој настан треба да ги соедини на еднo место во текот на тие два дена македонските млади дизајнери и од тоа да се родат понатамошни соработки, покрај тоа што ќе се поврзат директно со клиентелата на сите 20 дизајнери.
Засега потврдено е учеството на : ЛУДУС, Лидија Георгиева, „Атами и Гаја“, Chic Undercowear, Елена Спасовска, Јелкица Поповска, Acidwear Girls, „Линија“, Kapka Jewelry,„Еклектика“, Елена Ристовска, „Бипарт“, Билјана Каровска, Елена Поповска, Симон Ангел, Билјана Каран, Mikka Design и Bastet Noir. Целта на настанот е да се даде можност на дизајнерите да допрат до поширока маса, да се направи слика за македонскиот комерцијален дизајн во моментов. Доколку овој настан е успешен, веднаш почнуваме со организација на следниот…-додава тој.
Oваа година Драган планира да ја посвети на промоцијата на „Лудус“ на странскиот пазар. Yume беше претставена на престижниот саем Modepalast во Виена овој март. Оствари соработки со неколку бутици во Виена, Берлин, Сараево и Софија изминативе две години. Учествуваше и на Софиската недела за дизајн и месецот на дизајн во Љубљана.
Нема коментари