Нова доза на информативни прашалници на изложувачите во делот на мода и дизајн на четвртото издание на интернационалниот саем на современа уметност Паратисима Скопје во која ви претставуваме некои од меѓународните учесници на настанот. После првиот дел на Stylist.mk во кој прочитавте за Нина Нинеска, АТАМИ, Сара Реџиќ и Ксантика, и вториот посветен на Ем Елефантски, Cactus, Светлосна врска, Владимир Видановски и Pocket Gallery, во третиот дел запознајте се со работата на дизајнерот на накит Давиде Голцио (Wayfordesign) од Италија, дизајнерката на облека и накит Меа Батис од Словенија и шведското дуо Bim & Björk кое работи во Германија. Паратисима Скопје почнува утре, 15 јуни и ќе трае до 19 јуни, во просторот на Младинскиот културен центар.
Wayfordesign,Торино, Италија
Кратко инфо -Се викам Давиде Голцио и работам како дизајнер во Торино, Италија. Мојот бренд е Wayfordesign.
Што го прави Вашиот бренд единствен, препознатлив, уникатен? По што серазликува од останатите? – Накитот од Wayfordesign е оригинален и современ. Едноставни линии полни со ефекти и бои што може да се носат лесно и го бојат Вашето секојдневие. Креацииите се инспирирани од мотоспортот и патуваат со акценти од боја и италијанска креативност кон нови хоризонти. Направени се со 3Д печатење со разни материјали како резина и челик.
Зошто дизајнирате? Што најмногу сакате кај Вашата професија и дизајнот? – Сакам да креирам и измислувам нови линии од она што го гледам наоколу.
Каде се гледате по 10 години? Какви планови и очекувања имате за Вашиот бренд? – Би сакал да бидам познат дизајнер и да ги продавам моите производи во целиот свет.
Како се одвива Вашиот дизајнерски процес? Што сè е вклучено во Вашата работа како дизајнер? – Процесот почнува со слободна скица што се доработува во 3Д со компјутер, потоа ја бирам бојата и материјалот и типот на печатач.
Зошто одлучивте да учествувате на Паратисима во отсекот мода и дизајн? – Затоа што учествував на Паратисима во Торино и би сакал да го промовирам мојот бренд во странство.
Меа Батис, Словенија
Кратко инфо – Меа Батис е родена во 1981 во Постојна, по средно училиште за Дизајн и фотографија има студирано дизајн на текстил на Факултетот за природни науки и инженерство. Во 2014-тата стекнува Мастер за моден и текстилен дизајн. Нејзината магистерска работа беше номинирана за големата Прешерн награда за студенти, најголемото уметничко признание во Словенија. Нејзината работа (накит, текстилен дизајн, филм, фотографија…) била изложена на 15 самостојни и групни изложби. Нејзиниот бренд се вика еМе (магистерски проект). Брендот содржи рачно изработени предмети и современи парчиња накит од пластични кеси, внимателно осмислени и трансформирани во неверојатни форми, невообичаен накит, што понекогаш личи на склуптури од друг свет.
Што го прави Вашиот бренд единствен, препознатлив, уникатен? По што се разликува од останатите? – Брендот еМе е заснован на одржливи дизајнерски производи и селектирани парчиња изработени од пластични кеси што се залагаат за рециклирање на мислите, интегритет, грижа за луѓето и за животната средина.Така, фрлените пластични кеси стануваат симбол на масовното конзумирање и главен материјал за постојано истражување. Новите форми и текстури добиваат естетска вредност и даваат ново функционално значење на рециклирањето на пластичните кеси. Парчињата ги отсликуваат оригиналноста и занаетчиските вештини во целиот креативен процес. Покрај естетската нота, функционалноста на дизајнот е многу важен фактор.
Зошто дизајнирате? Што најмногу сакате кај Вашата професија и дизајнот? – Сакам да решавам проблеми. Во нашиот голем свет имаме огромни проблеми што не можеме да ги решиме, но во светот на дизајнот почнувате со малите нешта што ви задаваат проблем и создавате многу решенија, повеќето не се најдобрите, но отвораат други врати и перспективи. На крајот, секогаш се наоѓа друго решение и друг проблем.
Каде се гледате по 10 години? Какви планови и очекувања имате за Вашиот бренд? – Се гледам како дизајнер во светот на рециклирањето. Во светот на добриот дизајн што ги отсликува производите во совршена врска меѓу желбите и реалните потреби на конзументите. Соновите што сакам да ги живеам се одржлив дизајн.
Зошто одлучивте да учествувате на Паратисима во отсекот мода и дизајн? – Мислам дека Паратисима е поинаков поглед на нештата за мене, нешто што секогаш ми е потребно.
Bim & Björk, Берлин
Кратко инфо – Ние сме Бим Арнби и Маја Бјорк, Бим и Бјорк, шведско дизајнерско дуо базирано во Берлин. Пред 10 години се преселивме во Берлин и оттогаш имаме направено неколку соработки во независната уметничка сцена. Ова е прва колекција на облеки што ја правиме, Бим ги прави парчињата, а Маја ги прави декорациите. Колекцијата Treasure trasher е инспирирана од улиците и архитектурата на Нојкелн, Берлин, каде често се наоѓа ѓубре и вредни работи на улиците. Колекцијата е целосно произведена од рециклирани материјали, со почит кон работите што веќе постојат на кои им даваме нов живот.
Што го прави Вашиот бренд единствен, препознатлив, уникатен? По што се разликува од останатите? -Секое парче што го правиме е рачно изработено и уникатно. Концептот на рециклирање на материјали го прави целиот процес игрив и спонтан, не може да знаете каков ќе биде крајниот резултат. Деталите и мотивите ни се особено важни.
Зошто дизајнирате? Што најмногу сакате кај Вашата професија и дизајнот? – Заради забавата и фактот дека работиме заедно. Навиканати сме на самостојни проекти кога се работи за дизајн, па предизвик ни е да ги комбинираме идеите и најчесто се подобри отколку што може да ги замислите со својот ум. Два ума заедно се помоќни!
Каде се гледате по 10 години? Какви планови и очекувања имате за Вашиот бренд? – Се надеваме дека ќе продолжиме заедно да работиме и да ги развиваме нашите идеи. Сакаме да патуваме насекаде и да се инспирираме од ѓубрето и вредните работи низ целиот свет!
Како се одвива Вашиот дизајнерски процес? Што сè е вклучено во Вашатаработа како дизајнер? – Почнавме со прошетка во нашиот кварт и сликавме форми, предмети и бои што нèинспирираа. По внимателна селекција ги испечативме фотографиите што најмногу ни се допаднаа за да направиме мудборд заедно со исечоци од списанија што истотака ги најдовме на улица. Од овој мудборд произлегоа боите и мотивите. Бидејќи сите материјали се употребувани, тоа влијаеше на крајниот резултат.
Зошто одлучивте да учествувате на Паратисима во отсекот мода и дизајн? – Возбудени сме што ќе откриеме дел од Европа каде што не сме биле. Го видовме повикот на Паратисима на интернет и веднаш рековме – ова изгледа супер!
Нема коментари