Ријана во замокот Версај снима за „Диор“
Ријана официјално е новото заштитно лице на „Диор“ и воедно првото заштитно лице на модната куќа со обоен тен. Во минативе години пејачката честопати се појавуваше на ревиите на парискиот луксузен бренд, во последно време често носеше креации на „Диор“ во модни фотосесии за различни магазини, а откако деновиве е забележана во Париз како снима краток филм за куќата, беше јасно дека ќе се појави и официјалната информација за соработката меѓу Ријана и „Диор“.
Ријана на ревија на „Диор“ на последната Париска модна недела
Колку е Ријана добар избор за „Диор“!? Ако може Џенифер Лоренс да биде заштитно лице на луксузниот бренд, а покрај појавувањата на црвен килим и на свечени настани, во приватниот живот не покажува дефиниран моден стил, зошто да не може Ријана, која е храбра во стилот, секогаш интересна, модерна и безмилосно опасна во изгледот.
Пејачката е забележана деновиве како го снима четбртиот по ред филм од серијата Secret Garden на „Диор“
Ријана деновиве сними краток моден филм во Версај, нов од серијата Secret Garden на „Диор“. Филмот и принт кампањата ја работи фотографот Стивен Клајн. Ова е нов чекор на куќата, која иако е основана во далечната 1946 година, за првпат ангажира црномуреста личност за заштитно лице и со ова ќе внесе разновидност во имиџот. Ријана со ова го дополнува списокот на познати личности кои промовираат производи на брендот, а на кој се наоѓаат и Натали Портман, Џенифер Лоренс, Марион Котијар и Шарлиз Терон.
Во јануари Ријана седеше во првиот ред на ревијата за колекцијата на висока мода на „Диор“
Нема коментари