Паралелно со обврските како моден креатор и водењето на сопственото ателје во центарот на Скопје, дизајнерката Олгица Ѓоргиева се впушти во нов креативен предизвик и подготви костимогарфија за балетска претстава во Австрија. Зад себе има неколку костимографиски проекти за домашните театри, а после успехот со претставата „Електра“ на режисерот Ренато Занела за која креира костими лани летото на островот Сирос во Грција, тимот зад „Електра“ задоволен од нејзината работа, ја покани да биде дел и од новата балетска претстава Wolfgang Amadè во Ст. Полтен, Австрија. За Stylist.mk дизајнерката Олгица раскажува за прекрасното искуство креирајќи костии за овој балет, како што вели самата, искуство кое е огромно за неа од повеќе аспекти, како уметник, човек и професионалец. Овој проект, во еден кревок период од нејзиниот живот, ѝ донел посебен мир и една чистина која остава простор за креативност која што е суштински потребна за секој уметник.
Неодамна се врати од работно патување, од премиерата на балетската претстава Wolfgang Amadè во Австрија, за која што ги крираше костимите. Кажи ни нешто повеќе за претставата и за твојот ангажман?
-Ова е мој многу драг проект, затоа што сама на себе си докажав дека кога имате сон, желба, љубов, страст, талент, посветеност, храброст,трпение, пожртвуваност, многу работи што ги посакуваме можеме да ги освариме. Ова за мене претставува поттик како креативец, уметник, создавач! Мотивација посилно и похрабро да си продолжам по својот животен пат! Измитатово лето јас ја добив понудата да ја работам костиморафијата на претставата „Електра“, која се одржа на островот Сирос (веднаш до Миконос) во најстариот театар во Грција. Понудата ја добив од познатиот, интернационален режисер Ренато Занела, кој подолги години бил и и директор на Виенската опера и балет. Всушност, таа претстава беше мојата зелена карта за понатаму. Тие беа презадоволни од мојата работа и соработка, така што кога имаа нов проект, ме исконтактираа и ми понудија доколку сум заинтересирана да ја изработам костимографијата за претставата Wolfgang Amadè на кое што барање јас одговорив позитивно.
За каква престава станува збор, кој друг беше во тимот, како изгледаше работата на овој, за тебе, интернационален проект и со какво искуство се врати во Македонија?
-Режисер беше повторно господинот Ренато Занела, балетаните беа во склоп на „Еуропа балет“ од Ст. Полтен, Австрија, а самата претстава беше во соработка со еден од најпознатите австриски сликари Christian Attersee, кој за самата претстава ја наслика позадината на сцената. Прекрасни професионалци, огромно искуство за мене, од секој аспект и како уметник и како човек и како професионалец. Наредното ниво во секој аспект од животот е да видиш кај си, да сумираш и да одиш напред. Ова ми е посебно драг проект, затоа што ми зацврсти ментално многу ставови од повеќе аспекти, ми даде еден мир и една чистина која остави простор за нова креативност која за еден уметник е од неизмерно значење.
Во кој стил се костимите и како ја развиваше приказната за Волфганг Амадеус преку облеката?
-Како и самата претстава, која не беше типична класика, така и самите костими не беа типична копија на тоа време, иако комплетно ја следеа приказната. Ми беа дадени насоки и барања од страна на режисерот, така што работев по некоја веќе зададена програма.Имаше одредени параметри кои требаше да бидат задоволени и кои на некој начин беа појдовна точка за мене. Прво идејата се развиваше на хартија, после следуваше проба на костимите во Австрија, и на крај на 27 април беше премиерата во Ст. Полтен во Австрија, а на 17 мај во Сан Ремо, во познатиот театар Аристон, Италија.
Како реагираше публиката, успеа ли да почувствуваш реакција од нивна страна во однос на костимите?
-Јас генерално бев прифатена од секој можен аспект. После премиерата ми приоѓаа луѓе сами за да ми честитаат. Беше за нив необичен спој на приказна, малку поинаков поглед на класика и им беше интересно. На сцена добив овации што беше доволен показател дека им се допадна!
Дали после Ст. Полтен и Сан Ремо претставата ќе се прикажува и на други сцени?
-Се планира да се прикажува во повеќе држави. Во моментот се потврдени гостувања во Германија, Хрватска, Србија.
После неколку сработени костимографии, дали размислуваш да се посветиш токму на овој дел од креирањето? Каква е всушност разликата меѓу создавање модна колекција и костими за театарска сцена?
-Ова е ново искуство за мене, кое секако многу ми се допадна и доколку во иднина имам прилика за нови проекти, кои мене би ми одговарале, секако дека ќе ги прифатам. Но мојата модна приказна „ГО“, секако продолжува да постои. Принципот на работа е дефинитивно различен и од уметнички и од технички аспект
Кога можеме да очекуваме нова модна колекција?
-Секако ќе има нова колекција, од прилика почеток на октомври. Во меѓувреме ќе им се посветам на моите клиенти, на моето ново ателје и неколку помали проекти кои ќе бидат дополнување на моите активности во наредниот период.
Нема коментари