Триото од сламени торби, шапки и еспадрили вообичаено доминираат во летниот стил, но оваа сезона таа нивна доминација е уште понагласена, а сламените, јутените и модните парчиња од коноп се голем тренд. Сите тие имаат практична примена – шешири се шик заштита од сонцето, еспадрилите се екстра удобни за носење, а големите сламени торби се спас во лето, бидејќи во нив може да ставите сè што ви треба за еден цел ден поминат во град, во природа или на плажа. Покрај нивниот тренди и шик изглед, сите овие парчиња може да ги носите подеднакво во урбана средина и на летување и плажа.
Ова лето дефинитивно е во знакот на враќањето на сламените торби и плетените кошници, кои нè потсетија на стилот на Џејн Биркин во 60-тите и сега се инспирација на познатите трендсетерки. Плетените цегери и кошници се појавија како алтернатива на летната чанта во урбани, па дури и вечерни комбинации. Поголемите верзии се пак задолжителни за на плажа – моден и практичен детаљ во кој ќе ставите пешкир, резервен костим за капење, несесер со заштитни креми, книга за читање, шише со вода…
Сламените шапки се константа во летните денови, во однос на трендовите последните сезони актуелни се шапки со навезено име или некој друг термин, како и украсени со деликатни елементи, сатенска лента или помпом топче. Наша препорака е да ги избегнувате премногу накитените шапки кои се на граница на кич, бидејќи на цена секогаш е едноставниот шик изглед.
Еспадрилите се едни од најудобните и најлесни за носење летни обувки. Направени најчесто од платно и со ѓон од коноп, еспадрилите се исклучително трајни. Настанале уште во 13-от век, својот моден пробив го направиле во 70-тите години од минатиот век кога славниот креатор Ив Сен Лоран ги вметнал во своја колекција. Сезонава ги има во разни форми, ниски, на платформа, со полнета потпетица, дури и со отворени прсти, во разни бои и украсени со разни детали, а одлично го дополнуваат лениот стил. Еспадрилите успешно се комбинираат и со шапките и со сламените торби, а сите три гореспоменати модни детали добро се мешаат меѓу себе или можат да се носат одделно.
*Не е дозволено пренесување на содржината на www.stylist.mk без одобрение на уредништвото. При објавување на материјали од модниот сајт www.stylist.mk, во други медиуми задолжително наведете го изворот од кој е преземен текстот и поставете линк. Цитирањето и објавувањето на линкот е задолжително, во спротивност ќе подлежите на правни мерки.
Нема коментари