Со преку 50-тина закажани настани, ревии, отварања на бутици и презентации, Милано комплетно исполнува четиридневен официјален распоред. Помеѓу личниот предизвик и испитување на можностите, Stylist.mk во ексклузивно лично сведоштво се најде во првиот ред обезбедувајќи при тоа интервјуа на десетина од овие ревиски објави, меѓу кои едни од најголемите индивидуалисти на креативноста како Вивиен Вествуд, Џон Ричмонд, Филип Плеин и Антонио Марас, од потврдувачите на иновативноста во првите редови како „Костум Насионал“, MSGM, Ермано Шервино и „Портс 1961“, и од оние кои се вбризгани како свежа крв во миланскиот моден крвоток како Тилман Лаутербах, Том Ребл, D. Gnak и Џулијан Ѕигерли.
Ексклузивно за Stylist.mk, oд Милано, Анастасија Богдановска, фотографирана со Вивиен Вествуд
Dsquared2
И ако модата говори за животот тогаш eволуција на половите e она што е повеќе од очигледна дека се случува сега во секојдневниот живот. Отвореност кон експериментирањето со прифатливо конзервативното за сопствениот пол и веќе не така суптилно преземање на елементите кои го дефинираат спротивниот. По ревиите и улиците, мажите ги вкрстуваат сопствената женска страна со смелата инспирација и разиграност за секој дел од денот. Должно проследувајќи го животот, модата на Миланската недела на машка мода за сезоната пролет-лето 2015 е јасен транспарент на половата револуција која се случува сега и Stylist.mk ја пренесува ексклузивно од прва рака до очите на македонските будни проследувачи.
Antonio Marras
Визуелниот удар е јасен – актуелната модна свежина се вдахнува во машката мода. Ако таа е онаа која до скоро беше заглавена во здодевноста и повторувања на класичните линии и функционални форми, модниот свет рече доста е и ги разбуди идеите пред орманот наутро, отворено земајќи ја големата чанта на својата девојка, разигрувајќи ги здодевните обувки со дијамантски украси, релаксирајќи ја строгата професионалност со лежерна неформалност, но и воведувајќи моменти на елеганција во спортските активности.
И секој од дизајнерите со свој белег успеа да се најде во контурите на новите трендови. Па избледнети и скоро непостоечки се линиите помеѓу кројачката елеганција и спортскиот шик. Совршено одмерен микс на бои, нијанси, шари и материјали, но со максимизирање на бројот на елементи по аутфит, каде ниту една од овие димензии не подлегнува на едноставност. Дуксерите наликуваат на бомбер јакни, бомбер јакните се преточуваат во сако, а сакоатa сега имаат елегантни качулки и ластици до беспрекорна елеганција.
Неоспорно доминира балансот меѓу црното и белото, синото во аутфитите си игра со комбинирање на различни нијанси, присутни се и военото каки и забележливо сиво, но екслузивитет се јарко црвените костуми кои ја будат жарта на 70-тите. Јаките кои претежно ја задржуваат својата класична форма се разиграни со мониста и везени прешивачи кои се маркирани и на високите хип-хоп патики, кожените претоп чизми и плишаните еспадрили. Формите се строги, во совршено прав крој кои со иновативните материјали се одржуваат, но се разиграни со лежерните пантолончини и нежните плетки. Принтовите се жигот на брендовите, варирајќи од своерачни цртежи до совршени симетрии, комплементирани со карирани и јасно забележливи, на моменти и однадвор поставени чорапи.
Па екстравагантноста е конечно пренесена и на улиците, и така и преку публиката која ги проследува настаните, доминантно машка и претставници на печатот, е забележливо како се пробиваат границите на инспирацијата и потребата да се биде забележан. Принтовите се големи и во комбинации на силни клот нијанси, формите се прекршени и предимензионирани, а додатоците се игриви и со посебна доза на фантазија. Концентрирани секогаш на актуелното место на настанот за тој час, прават градот за момент да стане современ куклен театар со Мерцедез Бенз публика. Следуваат екслкузивните изјави со дизајнерите, куклените мастери на инспирацијата, директно од местото на настанот.
Нема коментари